Шығыс Қазақстан облысында ауа райы күрт бұзылды. Қатты желден ауылдар жарықсыз қалып, бораннан жол апаттары жиілеп кетті, - деп хабарлайды KAZINFORM.
Өңірде соңғы күндері ауа райы шорт бұзылды. Кеше қарлы бораннан жолдар бірінен соң бірі жабылып, жол апаттары да күрт көбейген.
— Автокөліктердің Осинов және Өмеш асуларынан жыраға құлап кетуі жиі тіркелді. Сондай-ақ Өскемен-Риддер, Өскемен-Шемонаиха, Өскемен-Тарғын-Самар тасжолдарында жол-көлік оқиғалары көп болды. Қатты боран мен жолдың дұрыс көрінбеуі салдарынан көлік қозғалысы шектеліп те жатыр. Абырой болғанда, осы демалыс күндері өңірде ірі жол апаты болған жоқ, — деп хабарлады ШҚО полиция департаментінен.
Ал Күршім ауданында қатты желден электр желісі үзіліп, бірнеше ауыл жарықсыз қалған. Солардың ішінде аудан орталығы — Күршім ауылы да бар. Жергілікті әкімдіктің мәліметінше, қазір қалпына келтіру жұмыстары жүргізіліп жатыр.