Атырау қаласындағы №8 мектептің педагогикалық ұжымы жаңа тағайындалған директордың қызметтен кетуін талап етіп, мұғалімдердің шағымы қанағаттандырылды, деп хабарлайды Azattyq Rýhy Ақжайыққа сілтеме жасап.
Естеріңізге сала кетейік, қазан айының басында 40-тан астам мұғалім мектеп директоры Әлия Ибраеваға қатысты қалалық білім бөліміне және басқа да органдарға шағым түсірген еді. Шағымда директордың мұғалімдерге дөрекі қарым-қатынас жасап, қорлау, намысына тию, еңбек заңнамасын және «Педагог мәртебесі туралы» заңды өрескел бұзғаны айтылған. Ұстаздардың үндеуін белсенді ата-аналар да жазбаша түрде қолдаған.
Директорды тағайындау республикалық «Білім берудегі 1 000 көшбасшы» бағдарламасы аясында жүзеге асырылған. Алайда, жанжалды шешуге жасалған бірнеше әрекет, оның ішінде ұстаздарды директормен татуластыруға ниеттену әрекеттері нәтижесіз болды. Ақыры, 13 қарашада Әлия Ибраева «денсаулық жағдайына байланысты» өз еркімен жұмыстан кетті. Бұған дейін оған педагогикалық әдеп нормаларын сақтамағаны үшін тәртіптік жаза – ескерту берілген болатын.
Қалалық білім бөлімінің басшысы Айнагүл Дүйсекенова бұл шешімді растап, редакцияның бірнеше сұрағына жауап беруден бас тартты. Атап айтқанда, ұстаздардың жалақысының неге кешіктірілгені, міндетті зейнетақы аударымдары мен медициналық сақтандыру жарналарының неге төленбегені, сондай-ақ өз құқықтарын қорғаған мұғалімдерге қысым көрсетілмеуіне қандай кепілдік бар деген сауалдар жауапсыз қалды. Дүйсекенова бұл сұрақтарға мектеп әкімшілігі жауап беруі керек екенін айтты.
Бұдан бөлек, ұстаздардың еңбек этикасынан тыс басқа да заңбұзушылықтарға қатысты шағымдары директор қызметтен кеткеннен кейін тексерілмейтін сияқты. Себебі мұғалімдер өз арыздарын қайтарып алған.