Павлодар қаласының полиция қызметкерлері Нұрсұлтан Назарбаев даңғылында орналасқан супермаркеттердің бірінде кассадан ірі көлемде ақша ұрлаған күдіктіні қолға түсірді, деп хабарлайды Azattyq Rýhy облыстық полиция департаментіне сілтеме жасап.
Алдын ала мәліметтер бойынша, ер адам дүкенге заңсыз кіріп, кассадан 781 мың теңге сомасында қаражатты қолды қылған. Күдікті өз кінәсін толық мойындап, оның осыған ұқсас басқа да қылмыстарға қатысы бар екені анықталды.
«Қазіргі уақытта ол Павлодар қаласының Полиция басқармасының уақытша қамау изоляторына қамалды. Аталған дерекке қатысты қылмыстық іс қозғалды», - делінген хабарламада.
Облыстық полиция департаменті тұрғындарға өз мүліктерін қорғау шараларын күшейтіп, бейнебақылау камераларын орнату және қауіпсіздік жүйелерін қолдану қажеттігін еске салды. Сонымен қатар кәсіпкерлерге нысандарды күзету және материалдық құндылықтардың ұрлануына жол бермеу бойынша шаралар қабылдау ұсынылды.