Оңтүстік Қазақстанға көмір жеткізушілер бағаны негізсіз өсірген болуы мүмкін. Қатты отын тасымалдайтын 13 компанияның жұмысына қатысты облыстық монополияға қарсы қызмет өкілдері тексеріс бастады. Мұндай шаралар Шымкент, Арыс, Түркістан қалалары мен Ордабасы, Төлеби аудандарында жүргізіліп жатыр. Биылғы қазан айында өңірде көмір құнының өскені байқалған. Бұл туралы табиғи монополияларды реттеу, бәсекелестікті және тұтынушылар құқығын қорғау комитетінің облыстық департаменті өкілдері айтады. Бағадағы бұл өзгерісте ымыраластықтың бар-жоғын құзырлы орындар анықтайды.
Жүргізілген мониторинг пен
аудан әкімдіктері берген мәліметтерге сәйкес, көмір бағасы 2017 жылдың қазан
айында көтерілгені анықталды. Облыста көмірдің бөлшек саудадағы бағасы 13000-20000
теңге аралығында болған. Нарық субъектілері берген мәліметтерде, қыркүйек
айындағы көмірдің сату бағасы орта есеппен тоннасына 10000-13000 теңгені
құрайтынын көрсеткен.