Норвегияның Лиллехаммер қаласында жасөспірімдер арасында өтіп
жатқан мәнерлеп сырғанау жарысында Қазақстан спортшысы Элизебет Тұрсынбаева
қола жүлде иеленді. Екі бағдарлама қорытындысы бойынша 167.88 ұпай жинаған
отандасымыз алдына тек Ресей спортшыларын шығарып алды. Спорт саласындағы өзге
де жаңалықтарды Самат Қанағатов жалғастырады.
Плей-офф жолдамасы үшін талас
жүргізіп жатқан елордалық «Барыс» командасы сырт алаңда ұтылды. Бұл сында Қазан
қаласының «Ақ Барс» клубына қонаққа барған Андрей Назаровтың шәкірттері 5-2
есебімен есе жіберді. Кездесуді сылбыр бастаған қазақстандық клуб бірінші
кезеңнің өзінде қақпасына үш шайба жіберіп алды. Екінші кезең басталғаны сол
еді, Федор Малыхин дубльдің авторы атанып, есепті 4-0-ге жеткізді. Қарымта
шабуылға шыққан «Барыс» хоккейшілері Дастин Бойд пен Роман Старченконың
көмегімен есепті екі шайбаға дейін қысқартты. Бірақ қуаныш көпке созылмады.
Үшінші кезеңде мергендігімен танылған Василий Тараканов бұл ойындағы соңғы
нүктені қойды. Андрей Назаровтың шәкірттері турнир кестесінің 9-шы сатысына
түсіп қалды. Енді плей-офф ойындарына қатысу үшін «Барыс» командасына қонақта
«Авангард» клубын жеңу қажет.
Футболдан чемпиондар лигасының
ойындары жанданды. 1/8 финалдың алғашқы ойын күні Францияның «Пари Сен Жермен»
командасы Лондонның «Челси» клубын қабылады. Кездесудің бірінші таймы 1-1
есебімен аяқталды. Алаң иелері сапында Златан Ибрагимович соққан голға қонақтар
Джон Оби Микельдің добымен жауап берді. Дегенмен, үзілістен кейін намысқа
тырысқан Лоран Бланның шәкірттері есепті еселеді. Әріптесінің пасынан кейін
қақпашымен бетпе-бет шыққан Эдинсон Кавани командасына жеңіс сыйлады. Екі
команда арасындағы қарымта кездесу 9 наурыз күні «Стэмфорд Бридж»
стадионында өтеді.
Келесі ойында Португалияның
«Бенфика» командасы өз алаңында Ресейдің «Зенит» клубын қабылдады. Кездесу
тартысты өтті. Бірінші таймда командалар қанша тырысқанымен есеп аша алмады.
Үзілістен кейін алаң иелері бірнеше мәрте гол соғатын мүмкіндікке ие болды.
Бірақ қонақтар қақпашысы қателікке бой алдырмады. Десе де, ойынның соңғы
минутында «Бенфика» командасы стандарттық жағдайдан есеп ашты. Әріптесінің
пасынан кейін баспен тура соққы жасаған Жонас командаластарының қошеметіне
бөленді. Екі команда арасындағы қарымта кездесу енді «Петровский» стадионында
өтеді.
Самат ҚАНАҒАТОВ