Қазақстанда алғаш рет мүмкіндігі шектеулі жандарды оқытатын автомектеп ашылады. Петропавлда «Ардос-жүрек» мүгедектер бірлестігі қазір арнайы көліктердің Ресейде қайта жинақталып жатқанын жеткізді. «Нұр Отан» партиясы ұйымдастырған әлеуметтік жобалар байқауы да жұмыстың әрі қарай жандануына оң септігін тигізді. Аталған бірлестіктің басшысы Ақжан Кәрімнің «Менің қолымнан келеді» жобасы «Қазақстанның ең үздік әлеуметтік жобалары» республикалық байқауында СҚО-нан қатысқан жұмыстардың үздігі деп танылды. Жоба әлеуметтік кәсіпкерлікті оқытуға және бұл бағытта енді іс бастаған жастарға кеңес беруге бағытталған. Үміткерге 1 млн теңгенің сертификаты берілді. Жоба нәтижесінде мүмкіндігі шектеулі жандар бизнестің қыр-сырын біліп қана қоймай, автомектепте көлік жүргізуді үйренеді.
Сәлімхан Сәбитов, «Ардос-жүрек» мүгедектер бірлестігінің мүшесі:
Бұл өте белсенді мәселе. Себебі біздің қаламызда 10766 мүгедек адам бар. Олардың ішінде 8339 адам іс-қимыл әрекеті қиын жағдайда болып тұр. Біреуінің аяғы, біреуінің қолы істемейді. Сондықтан біз сондай адамдарға автомектеп ашып жатырмыз. Бұл автомектеп Қазақстан бойынша бірінші автомектеп болып ашылып жатыр.
Ал
160-қа жуық науқас баланың емделуіне және денсаулығының қалпына келуіне ықпал
еткен «Алақандағыдай өмір» жобасы Қостанай облысынан қатысқан үміткерлердің үздігі
деп танылды. 625 млн теңгеге көмек көрсеткен «Дерек» қоғамдық бірлестігіне де 1 млн теңге ақшалай сертификат табысталды. Өңірлік конкурстың екінші орын иегерлеріне 700 мыңнан, 3 орын алғандарға 500 мың теңгеден берілді. Қостанай облысынан үздік әлеуметтік жобалар байқауына қатысуға 23 өтінім түскен. Конкурс «Нұр Отан» партиясы, Еңбек және халықты әлеуметтік қорғау министрлігімен, әлеуметтік сақтандыру мемлекеттік қорымен, жергілікті әкімдіктер мен бизнес-қоғамдастықтарымен бірлесіп жүзеге асырылып жатыр. Өңірлік байқаудың жеңімпаздары республикаға жолдама алады.
Ғалия МҰХАМБЕТҚЫЗЫ, Астана телеарнасы