Астанада
ұлттық спорт үздіктері марапатталды. «Бейбітшілік және келісім сарайында» өткен
салтанатты кеште 11 спортшыға «Алтын тұғыр» сыйлығы табысталды. Іс-шараға
ұлттық спорттың жанашыры «Нұр Отан» партиясы мұрындық болды. Өз сөзінде
партия төрағасының бірінші орынбасары Асқар Мырзахметов төл спорт түрлеріне
еңбек сіңіріп жүрген азаматтарға алғысын айтты. Партияның бұл бағыттағы
қамқорлығы жалғаса бермек. Асқар Мырзахметов төл спортқа бет бұрғандар санының
артуын оларды ұйымдастыру деңгейінің сапасымен байланыстырды.
Асқар
Мырзахметов, «Нұр Отан» партиясы төрағасының бірінші орынбасары:
Биылғы
жылы теңге ілуден алғаш рет Азия чемпионаты өтсе, «Алтын тұлпардан» екінші рет
республикалық турнир өтіп отыр. Ал енді «Қазақстан барысы» «Еуразия барысына»
айналғандығы, сөз жоқ, біз үшін үлкен мақтаныш. Өйткені Елбасының да айтып
отырғаны біз елді таныта білуіміз керек, елдің ерекшелігін көрсете білуіміз
керек.
«Алтын тұғыр» бәйгесі алғаш рет 2013 жылы
үлестірілген-ді. Оның мақсаты - төл спорттың үздіктерін анықтау арқылы оны
кеңінен насихаттау. Қанжығасына бәйге байланғандар елде ұлттық спорт
түрлерінің дамуына барлық жағдай жасалғандығын айтады.
Айкөз
Ералхан, «Алтын тұғыр» сыйлығының иегері:
Менің
жамбы ату спортына қатысқаныма бір жылдан астам уақыт болды. Осы бір жылдың
ішінде ел чемпионы болып, жетістікке жетіп отырмын. «Алтын тұғыр»
номинациясының жеңімпазы болғаныма қуаныштымын. Алда бірталай жетістікке жетуге
тырысамын.
Қайрат
Сатыбалды, «Нұр Отан» партиясының хатшысы:
Жамбы
ату бәсекесін дамыту жоспары бар. 2016 жылы «Алтын жебе» халықаралық турнирі
салтанат құрмақ. Осы дүбірлі додаға қазірден дайындықты бастауымыз керек.
Елбасы бастаған әрбір іске біз ерекше құлшыныспен кірісеміз. Себебі еліміздің
алдында үлкен міндеттер тұр. ЭКСПО-2017 халықаралық көрмесін абыроймен атқару - баршамыздың борышымыз. Өздеріңізге мәлім, аталған шараға келетін шетелдіктер,
біздің ұлттық ерекшеліктерімізге, дәтүрімізге, спортымызға айрықша назар
аударады.
Ал
ұлттық спорт түрлерін кеңінен насихаттаған ақпарат құралдары арасынан
"Астана" телеарнасына "Алтын тұғыр" табысталды. Сыйлықты арна басшысы Ләззат Танысбайға Ұлттық спорт қауымдастығының
президенті Бекболат Тілеухан табыстады.
Азамат АЛДОҢҒАРОВ