Астанада
«Мәңгілік ел - Болашағы біртұтас ұлт» республикалық патриоттар форумы өтті.
Оған 2 мыңнан аса делегат қатысты. 2007
жылдан бері форум жылдың айтулы оқиғалары аясында Қазақстанның түрлі
қалаларында өткізіліп келеді. Ал
биылғы басқосу Мемлекет басшысы Нұрсұлтан Назарбаевтың «Мәңгілік ел»
жалпыұлттық идеясына арналды.
Жұрағат
Баман, тілші:
«Асыл тастан, ақыл жастан» демекші.
Бүгінгі астаналық форумға елімізге танымал белсенді жас тұлғалар қатысуда.
Олардың қатарында «Болашақ» бағдарламасы бойынша шетелде сантүрлі мамандық
иегерелері атанған, сондай-ақ спорт және өнердегі жас танымал тұлғалар, жас
әкімдер мен жас депутаттарды да осы жерден кездестіруге болады. Жалпы еліміз
жастар саясатына зор мән беріп отыр. Олардың бастамалары да мемлекет тарапынан
үлкен қолдау табуда.
Форумда
өз ісінің үздіктері жалпыұлттық идеяға қатысты ойларын ортаға салып, құжаттың
маңыздылығына айрықша тоқталды. Елбасының патриоттарға арналған құттықтау хаты
да жиын барысында оқылды. «Мәңгілік ел»
идеясын ту еткен қатысушылар өз
салаларындағы жетістіктерімен бөлісті. Қайырымдылық қорын ашып, ата-ана
қамқорлығынсыз қалған жандарға көмек қолын созып жүрген азаматтар жалпыұлттық идея қайырымдылық
саласын да толық қамтып отырғанын жеткізді.
Аружан
Саин,
«Мейірімділік» ерікті қоғамы» қорының директоры:
Еліміздің әрбір азаматын аялы
алақанымызда ұстап, көмекке зәру жандарға қамқор болудың өзі - патриотизм. Ал Елбасының
осы жалпыұлттық идеясы жақсылық жасап, мейірімді әрі шынайы қамқоршы болуға
үндейді.
Патриоттықтың нағыз үлгісін
көрсете білгендердің бірі - Асхат Мырзабаев. Ол Ұлыбритания банкінде жарты жыл
қызмет етіп, екі миллион доллар шамасындағы сыйақысын Қазақстандағы
онкологиялық аурулармен күресуге жұмсаған.
Асхат
Мырзабаев:
Мен
жетістікке ынта-жігер, өз еліме деген сүйіспеншілігімнің арқасында қол
жеткіздім. Өмірде ешқандай шектеу жоқ, сондықтан әр қазақстандық азамат өзін
тек алға ұмтылдыруы керек.
Жиынға ғарыштан жуырда ғана жерге оралған қазақ
ғарышкері Айдын Айымбетовтің қатысуы
жастарды жігерлендіріп, патриоттық рухтарын бір көтеріп тастады.
Форум
аясында жыл сайынғы «Жыл патриоты» байқауының қорытындысы шығарылды. Байқауда ерлік көрсеткен, сондай-ақ Отанға деген
сүйіспеншілігін күнделікті еңбегі мен нақты істерімен дәлелдей білген қазақстандықтар
жеті номинация бойынша марапатталды.
Жұрағат БАМАН