«Аудан әкімінің орынбасарына тиесілі автокөлік адам қақты, бірақ жазаланбады». Тараз қаласындағы Төлегеновтар әулеті осылай деп базыналы. Айтуларынша, көшеде кетіп бара жатқан 19 жастағы ұлдарын Байзақ ауданы әкімінің орынбасарының көлігі қағып кеткен. Көлік рулінде кім болғаны анық емес. "Содан бері 2 ай өтсе де, не көмек, не кешірім сұрап келген жан болмады", - дейді зардап шеккен жігіттің туыстары. Ал ажал аузынан аман қалған Әзизбек Кеңесов әлі күнге төсекке танылған. Полиция болса, тергеудің жалғасып жатқанын алға тартуда.
Оқиға 18 қаңтар күні түнгі сағат 2 жарымда осы көшенің бойында
болған. Ағалы-қарындас сол түні бірге үйлеріне келе жатқан. Ақжағалы атқамінердің
темір тұлпары зулап келіп, жол жиегіндегі жігітті дәл осы жерде қағып кетеді.
Онымен қоймай, бір бағыттағы жолменен қаша жөнелген. Бірақ зардап шегуші
Әзизбек Кеңесовтың қарындасы көлігін ұялы телефонына түсіре бастағынын көріп,
қайта қайырылып келіпті.
Жанерке Кеңесова, қарындасы:
Пешеходтан өттік. Жұлып алып кетті.
Үстінде кәдімгідей кетіп бара жатты. Артынан жүгірдік, көріп тұрмыз көз алмай.
Анау болса тоқтамайды. Музыка болса дар-дар етіп. Ал ол болса кетіп бара жатыр. Бізге қарай қайтып келді. Бамперін жинап жатыр. Ал маған келіп неге түсіріп
жатырсың деп айғайлайды.
Әзизбек бір апта жансақтау бөлімінде жатып шықты. Беті бері қарағанмен, әлі
күнге төсекке таңылған. Қозғалыссыз жатқанына 2 ай болып қалды. Соққының
салдырынан миы шайқалып, жамбас сүйегі морт сынған.
Әзізбек Кеңесов, зардап шегуші:
Артыма бір қараған кезде машинаның дауысы шықты да, артымда тұр екен көлік.
Ары қарай жансақтау бөлімінде ояндым ғой. Білмеймін ары қарай. Жүргім келеді іш
пысып кетті. Ауырады қақсап. Күн бұзылса. Қозғалта алмайсың, тізе бүгілмейді.
Сол жағымның саны сүйек тесіп шықты. Оң аяқтың тізеден төмен сынды ғой.
Кейін белгілі болғандай, студентті 10 шақты метрге сүйреп
әкеткен Тойота - Байзақ ауданы әкімінің орынбасары Мақсат Демесіновтің
қызметтік көлігі. Жүре алмай қалған баланың әкесі ақжағалы шенеунік болған жайды
құпия қалдырғысы келеді, тіпті тәртіп сақшыларымен ауыз жаласып алған деп
айыптайды.
Сейтқали Төлегенов, Ә.Кеңесовтың әкесі:
Байзақ ауданы әкімінің орынбасары Демесінов, қалалық жол полиция бастығы
Күлшашов, және Досымов, Оспановқа іс қозғалуын талап етемін. Неге? Өйткені істі
басынан бастап дұрыс жүргізбей, бір жақты жүргізгендері үшін. Баламнан,
қасындағы қыздарымнан түсінік алмағандары үшін.
Тәртіп сақшылары болса, көлік жүргізген азаматты әлі тергеп жатырмыз дейді.
Жол көлік оқиғасы бойынша 22 ақпанда іс қозғалғанын растады.
Талғат Сатыбалдинов, Жамбыл облыстық ІІД анықтау басқармасының анықтаушысы:
Тергеу әлі жүріп жатыр. Көлік жүргізген жігіттің оқиға кезінде ішімдік
ішпегенін анықтадық. Жүргізуші куәлігі де алынды. Сондықтан құжатсыз көлік
басқаруға құқы жоқ.
Алайда адам қақты деп айыпталып отырған жүргізуші темір тұлпарын түк
болмағандай қайта тізгіндеп алыпты. Ол кісі қаққанын мойындайды.
Ал жүргізушіні жалдаған аудан әкімінің орынбасары журналистерге жауап беруден жалтарды.
Жол апаты. Адам қаққан екен, осыны растайсыз ба? Бір ауыз жауап берсесіз бе
бізге? Сіздің көлік қой оқиғада болған?
Мақсат мырза! - Жоқ ештеме айтпаймын. Сот шешеді оны.
Осылайша, көлігіне тығылған шенеунік шешіліп ештеңе айта алмады.
Жүргізушісі жазықты болса, екі жыл жаза арқалауы мүмкін. Ал сау баламызды сал
қылды деген туыстары кінәлі адам тиісті жазасын алмайынша тынбаймыз деп отыр.
Данияр ӘЛІМҚҰЛ