Билікте
ауыс-түйіс орын алды. Президент бірқатар тағайындаулар туралы Жарлықтарға қол
қойды. Ұлттық экономика министрлігін Қуандық Бишімбаев басқарады. Оны ұжымға
Премьер-министр Кәрім Мәсімов таныстырды. Қуандық Бишімбаев «Болашақ»
бағдарламасы бойынша АҚШ-та Менеджмент және бизнес мектебін бітірген. Бизнес
басқару магистрі дәрежесіне ие. Соңғы жұмыс орны - «Бәйтерек» холдингі.
Күні
кеше Ақордада өткен кеңесте Президент Ақпарат және коммуникация министрлігін
құру керек деген пәрмен берді. Жаңа ведомствоға Дәурен Абаев жетекшілік ететін
болды. Дәурен Әскербекұлы бұған дейін Қазақстан Президентінің кеңесшісі -
Президенттің Баспасөз хатшысы қызметтерін атқарған.
Ауыл
шаруашылығы министрі де ауысты. Президент сынына іліккен Асылжан Мамытбеков
отставкаға кетті. Нұрсұлтан Назарбаев Жер кодексі сөз болған кешегі жиында оны
кемшіліктерге жол бергені үшін сынаған.
Мамытбеков басқарған ведомство да бос қалмады. Бұл орынтаққа Асқар
Мырзахметов жайғасты. Асқар Исабекұлы бұған дейін «Нұр Отан» партиясы
төрағасының бірінші орынбасары қызметін атқарды. Ауыл шаруашылығы саласынан
тәжірибесі мол азамат бұл министрлікті осыған дейін де бір рет басқарған.
Ләйлә
ҚАЗИАҚПАРОВА