Астана күні қарсаңында Елорданың кішкентай тұрғындарына әлемнің белгілі
иллюзионистері ұмытылмас «Magic Astana» шоуын ұйымдастырмақ. "Фестивальді
тұрмысы төмен және көп балалы отбасылардан шыққан 1200 бала тамашалайды", - деп қалалық Білім басқармасы хабарлады.
Жоспарланған екі концерттің бірі әлеуметтік жағдайы нашар отбасылардың балаларына арналғандықтан тегін болады.
Бейбітшілік және Келісім сарайында өтетін шараға танымал ресейлік
иллюзионистер - ағайынды Сафроновтар, Александра Скачкова, Антон Абрашеков,
Александр Муратаев, Павел Карахтанов өнер көрсетеді.
Сондай-ақ, шарада украиналық менталист Артем Тихевич, жоғары санаттағы қырғыз иллюзионисті
Ильдар Ягофаров өнер көрсетеді. Голландиядан да келетін қонақтар бар.
Иллюзионистердің айтуынша, нөмірлер әртүрлі бағытта қойылып, балалардың
сиқырлық әлеміне саяхаттауына мүмкіндік береді.
Азамат АЛДОҢҒАРОВ