Бүгін Оралда мерейтойлық Ұлттық Дельфий ойындары басталады. Қазақстанның
түкпір-түкпірінен келген 500-ге жуық өнерпаз «Мәдениет - достық шаңырағы» деген
ұранмен 15 аталым бойынша бақ сынайды. Өнерлі өрендердің өрісін кеңейтуді
көздеген өнер сайысы биыл оныншы рет өткізіліп отыр.
Құбыжықтар шеруін елестетер бұл көрініске Әйгерім көптен дайындалыпты. Жас
сәнгер өзінің кезекті туындысын тылсыммен тілдескен бақсы-шамандарға арнаған.
Бес саусағынан өнер тамған шебер теріден бастап, жүн-жұрқаның өзін кәдеге
жаратыпты.
Әйгерім Қоқымбай, Х Ұлттық Дельфий ойындарына қатысушы:
Менде бірнеше материалдардан тігілген. Мұнда көбінесе теріден, жаңағы киізден, қолөнердегі тоқымадан, сонымен қатар, металл өнімдерінен жасалған.
Сонымен қатар, ағаш өнімдерімен де қосылыстары бар.
Ал қызылордалық фотосуретші Ернар Мүбәрак осыған дейін Америкада тәлім
алып, шеберлігін шыңдаған. Фотоаппаратты серік еткен талапкер бұл сайысқа ең
таңдаулы туындыларын ала келіпті.
Ернар Мүбарак, Х Ұлттық Дельфий ойындарына қатысушы:
Мен өзімнің алып келген жұмысым бойынша, мынау Қызылорда қаласы Сыр елі,
жыр елі болғандықтан, Қызылорда қаласы өзінің күрішімен мақтанады. Бұл
Қызылорда облысындағы Арал өңірінде орналасқан күрішті алқаптың суреті. Бұл
сурет мен үшін өте маңызды.
Үмітін үкілеген бес жүзге жуық сайыскердің дайындығы қарбалас. Ал бишілер
үшін қонақ үйдің ауласы жаттығу алаңына айналған.
Жарыс биыл 15 түрлі аталым бойынша өткізілуде. Дәстүрге сай, ойын
бағдарламасына «Күн әлемі » балалар шығармашылығы фестивалі де енгізілген. Айта
кетейік, биыл Волгоград қаласында өткізілген Еуропалық Дельфий ойындарында
қазақстандық өрендер жүлделі екінші орынды иемденіпті. Сондықтан бұл жарыста
үздіктердің үздігі озып шығатынына ұйымдастырушылардың сенімі мол.
Лаврентий Бобрышев, Халықаралық Дельфий
ойындары қамқорлық кеңесінің мүшесі:
Осындай жарыстар арқылы
өнерпаздарды іріктеп, Қазақстанды халықаралық деңгейде танытуға тырысамыз. Біз Дельфийлік
ойындардың ұлттық олимпиадаға теңестірілгенін қалаймыз. Егер осы талабымыз іске
асса, осы ойында жеңіске жеткен өрендер жоғары оқу орындарына еш кедергісіз
түсіп, мемлекеттік грантты иелене алады.
Дельфий ойындары - бірнеше өнердің басын тоғыстырған бірегей шығармашылық
жоба. Таланттарды іздеп тауып, олардың кеңінен танылуына да мүмкіндік береді.
Күні бүгін Халықаралық Дельфий қозғалысына 36 мемлекет мүше. Оралдағы ойындар
жексенбі күні өз мәресіне жетеді. Осы сыннан сүрінбегендер Қазақстан атын
халықаралық деңгейде танытар жарысқа жолдама алмақ.
Еркін КАРИН