«Инновациялық автобус» - Жамбыл
жерінде. Бұқараны бизнеске баулу мақсатында Таразға инновациялық
бизнес-жоспарды ұйымдастырушылар келді. Мамандар өнертапқыштарды, жас ғалымдар мен болашақ
бизнесмендерді іздестірмек. Тараз мемлекеттік университетінде бас
қосқан инноваторлар ұтымды жоба арқылы бизнес тізгінін ұстағандарды көпшілікке
үлгі етті. Озық идея авторларын тауып,
олардың бизнес-жоспар байқауына өтініш беру мүмкіндіктерін әңгімеледі.
Алматы мен Астанада кәсіпкерлерге қызмет
көрсететін «Даму» қорының жанынан байқаудың фронт-кеңсесі құрылмақ. Онда өнертапқыштардың өтініштері қабылданады.
Электронды үкімет аясында онлайн тәртіпте ұсыныс жолдауға да болады.
Бауыржан Айтілеу,
"Технологиялық даму жөніндегі Ұлттық агенттік" АҚ басқарушы директоры:
Өтінімдер саны қазірдің өзінде
100-ге жуық бүкіл Қазақстаннан келді. Осы айдың 31-не дейін әлі өтінімдер
келеді деп ойлаймыз, 500-ден артық өтінім жинайтын шығармыз. Байқаудың финалына 16 жоба өтеді. Солардың
арасынан үш деген үздік жобаны атап, бірінші орынға 7,5 миллион теңге береміз.
Екінші орынға - 2,5 млн. Үшінші - 1 миллион теңгеге ие болады.
Бастаманы Индустрия және жаңа
технологиялар министрілігі мен Технологиялық
даму жөніндегі Ұлттық агенттік сарапшылары 2006 жылдан бері іске асырып
келеді. Бүгінгі байқау жеңімпазына ақшалай грант берілді. Көптің назарын
бей-жай қалдырмаған жоба дала өртін сөндіретін
тіркемелі техника болды. Оның өзге құрылғылардан айырмашылығы - қызыл жалынды
топырақпен сөндіреді. Ешқандай химиялық қоспа қолданылмайды.
Сағатбек Мырзашев, өнертапқыш:
Фрезарлы-роторлы топырақ
лақтырғыш машинаның жобасын ұсынып отырмын. Біздің ұсынған жобамыз егер жеңіске
жетіп, министрлік тарапынан қолдау табатын болса, оны біз Төтенше жағдайлар
жөніндегі министрлікке және Ауыл шаруашылық министрлігіне ұсынамыз. Олар осы
машинаны өндірісте қолдану керек деп ойлаймын.
Данияр ӘЛІМҚҰЛ