Әрбір тұтынушыға сапалы
азық-түлік. Бүгін елорда базарларының сөресінде орын тепкен азықтардың сапасын
санитар мамандар арнайы тексерістен өткізді. Аталмыш акцияны
Тұтынушылардың құқығын қорғау агенттігі бесінші жыл қатарынан өткізіп отыр.
Олардың айтуынша, бір жыл ішінде тауарлардың сапасы артқан.
Мәселен, өткен жылы
тұрғындар тарапынан сапасыз өнімге қатысты 515 шағым түскен болса, биыл бұл
көрсеткіш 90-ға тұрақтады. Акцияға қатысам деушілер көптеп жиналған. Арнайы
тексерістен өткізу үшін, тұтынушылар мен саудагерлер өз өнімдерін
әкеліп жатты.
Нұрсұлтан Зият, сатушы:
Арбузды сапасын тексертуге алып
келгем, арбуз әдемі шықты. Жақсы, жеуге жарайды. Өзіміз біз көрейік деп, тексерткем.
Акция барысында тұтынушылар еттен
басқа кез-келген өнімді жедел зерттеуден өткізу мүмкіндігіне ие болды. Ең жиі
сыналған тауарлар қатарында жеміс-жидектер мен шұжық өнімдері де бар. Тексеріс кезінде
елордада саудаға түскен өнімдерден айтарлықтай кінәрат табылмады.
Гүлзира Бәйбекова, сатушы:
Колбаса жақсы деді. Өте жақсы, ішіндегі составы да жақсы, халал. Мен екінші рет тексертіп отырмын.
Еліміз бойынша көкөніс пен
жемістің жаппай пісу маусымы да басталып кетті. Осы азғана уақыт аралығында
өнімдерден мың жарымнан астам сынама алынды. Оның жетеуінен нитрат мөлшерінің
жоғары екендігі анықталған. Алайда шағын және орта бизнес иелерін тексеруге
мараторий жариялануына сәйкес, сапасыз өнім сатқан кәсіпкерлерді жазаға тарту
қиын көрінеді. Бүгінгі тексеру барысында зиянды өнім анықталмады. Базар
әкімшісінің сөзіне сенсек, мұндай өнім сөрелерге түспейді. Себебі саудаға
келген тауар бірінші кезекте сауда орталығының өз сараптамасынан өтеді.
Гүлден Нұрғалиева, базар
әкімшісінің орынбасары:
Бірнеше тексерулер жасалды.
Барлығы да дұрыс болып шықты. Бізде өзіміздің тексеруші лабораториямыз бар.
Олар күнде тексеріп отырады. Егер болған жағдайда, оны саудаға қоймайды, оны
жояды.
Азамат АЛДОҢҒАРОВ