Болашақта ЮНЕСКО-ның клубтары құрылуы мүмкін. Ұлттық комиссиялардың бірінші
аймақаралық кеңесі барысында Африка елдерінен келген өкілдер осындай ұсыныс
айтты. Беделді ұйым өкілдері басқосуының басты себебі - Ұлттық
комиссиялардың өзара байланысын нығайту. Сондай-ақ жиында ЮНЕСКО-ның әлеуетін
дамыту, ұйымды басқару, қаржыландыру және бағдарламаларға қатысу жайы
талқылануда. Барлық ұсыныстардың шешімі ертең қорытынды жиында белгілі болады.
Айта кетейік, Астанада өтіп жатқан ЮНЕСКО істері жөніндегі Ұлттық
комиссиялардың бірінші кеңесіне 125 елден өкілдер қатысуда.
Андрей Шевелев, ЮНЕСКО Бірлескен қоғамы мен Ұлттық комиссия секциясының
бағдарламалар бойынша маманы:
Біздің Ұлттық комиссиялар мен өңірлердегі бюро арасында бірнеше жылдан бері
қордаланған мәселелер бар еді. Тіпті кей мемлекеттердегі Ұлттық комиссия
мүшелерінің бір-бірімен тіл табыса алмауы жиілеп кетті. Сондай-ақ, аралары тым
алыс елдер бірігіп жұмыстар атқарғысы келгенмен, оларды байланыстыратын орта
болмай жүрді. Міне, осы кеңес барлық мәселемізді шешуге мүмкіндік берді.