Қазақстандық
былғары қолғап шебері Жанат Жақиянов «Еуразия» чемпионы атағына қол жеткізді. Минск қаласында өткен жекпе-жекте отандасымыз Грузия спортшысы Гаги
Эдишерашвилиді бірінші раундта нокаутпен жеңді. Бұған дейін жеңіл салмақта сынға
түсетін жерлесіміз Еуропа чемпионы белбеуін ұтып алды.
Астанада бокстан «Чемпиондар жекпе-жегі» турнирі
аяқталды. Бұл сында «Астана Арландары» клубы Бостандық Аралынан келген «Куба Домадорес» командасымен
өзара мықтыны анықтады. Екі күнге жалғасқан жарыс барысында кубалық былғары
қолғап шеберлері 6-4 есебімен жеңіске жетті. Дүбірлі доданың екінші жарыс күні
«Арландар» сапында Мирас Жакупов, Мадияр Ашкеев және Филипп Хргович жеңіс
тойлады. Ал өз кездесулерінде қарсыластарынан айласын асыра алмаған Роман
Чегринов пен Хрвое Сеп жанкүйерлер сенімін ақтай алмады.
Жаңа маусымды сәтті бастап, қатарынан үш ойында
үздік шыққан «Барыс» командасы күтпеген жерден сүрінді. Құрлықтық хоккей
лигасының кезекті турында Мәскеу облысының «Витязь» клубының қабылдаған Андрей
Назаровтың шәкірттері үш ұпайдан құр алақан қалды. Бұл кездесудегі алғашқы
шайбаны қонақтар сапында Юрий Кокшаров соқты. Бұл шайбадан кейін шабыттанған ресейлік
хоккейшілер үзілістен кейін есепті еселеді. Бұл сында жеке шеберлігімен
танылған Марио Кемпе мүлт кетпеді. Қалған
уақытта «Барыс» командасы есепті қысқарту үшін барын салғанымен, қорғанысы мықты
«Витязь» клубы жеңіс есебін ұстап қалды.
14 қыркүйек күні Ақмола олблысындағы Қабанбай
батыр ауылының аумағында аламан бәйгеден «Алтын тұлпар» республикалық турнирі
өтеді. Дүбірлі жарысқа еліміздің 14 облысы мен Алматы және Астана қалаларының
шабандоздары қатысып, бас жүлде үшін талас жүргізеді. Аталған шара аясында «ат
сыншысы» байқауы, ат тағалаушы шеберлер жарысы сондай-ақ, ұлттық жәдігерлер
көрмесі мен ұлттық қолөнер шеберлерінің шеберхана көрінісі өтеді. Ауқымды шара
алдында турнир ұйымдастырушылары БАҚ өкілдерімен кездесіп, жоспарымен бөлісті.
Қаныбек Жұмашев, «Нұр Отан» партиясы орталық аппараты
басшысының орынбасары:
Ұлттық
спорт түрлерін дамытуда партия ерекше көңіл бөледі. Бұл - көкпар, бәйге,
аударыспақ, теңге алу. Міне бүгінгі таңдағы қолға алынып отырған мәселе аламан
бәйге. Бұл ұлттық спорт түрлері қауымдастығының ұсынысы берілгеннен кейін. Оны
жақсылап қарап, зерттеп, өте дұрыс қолдауды қажет етеді деп таныдық.
«Алтын тұлпар» республикалық турнирінің өтуіне ұйытқы болған «Нұр Отан» партиясы мен
еліміздің ұлттық спорт түрлері қауымдастығы.
Самат
ҚАНАҒАТОВ