Елордалық
«Барыс» командасы биылғы маусымдағы 25-ші жеңісіне қол жеткізді. «Торпедо»
клубымен болған ойынды толассыз шабуылдармен бастаған айдын иелері қарсыластың
қақапасына жауапсыз үш шайба соқты. Бұл сәттерде Дастин Бойд, Майк Ландин және
Константин Романов мергендігімен танылды. Қарымта шабуылға шыққан «Торпедо»
хоккейшілері есепті 3-2-ге дейін қысқартты. Бірақ қонақтардың қуанышы көпке
созылмады. Қалған уақытта жасындай жарқыраған «Барыс» командасы ресейлік
клубтың қақпасына тағы екі шайба соғып, жанкүйерлер қошеметіне бөленді. Келесі
кездесуін Андрей Назаровтың шәкірттері Минск қаласының «Динамо» клубына қарсы
өткізеді.
Андрей
Назаров, «Барыс» клубының бас бапкері:
Кездесу
тартысты өтті. Ойыннан жанкүйерлерде жақсы әсер алды деп ойлаймын. Жеңіске
қарамастан, қорғаныс шебінде олқылықтар болды. Сондықтан келесі ойынға
тыңғылықты дайындық жүргіземіз.
Сондай-ақ,
төрткүл дүние көз тіккен «Дакар» марафоны аяқталды. Екі аптаға созылған жарыс
барысында командалар 9 мың шақырымды бағындырды. Қазақстанның атынан дәрежелі
жарысқа екі экипаж қатысты. Жол талғамайтын көліктер жарысында сынға түскен
Андрей Чередниковтың экипажы жалпы есепте 25-ші орынға тұрақтады. Ал ауыр жүк
көліктер жарысына қатысқан Артур Ардавичустың экипажы жалпы есепте 11-ші сатыға
көтерілді. Естеріңізге салайық, Артур Ардавичус бастаған «Астана» командасы
2012 жылы «Дакар» марафонының қола жүлдесін ұтып алған еді.
Артур
Ардавичус, «ASTANA MOTORSPORTS» командасының жетекшісі:
Дакар
марафоны мәресіне жетті. «Астана моторспортс» командасы жарысты сәтті аяқтады.
Бізге қолдау көрсеткен жанкүйерлерге алғысым шексіз.
Тағы
бір жағымды жаңалық, «Астана» баскетбол командасы көптен күткен жеңісіне қол
жеткізді. Бұған дейін қатарынан үш ойында есе жіберген Рамунас Бутаутастың
шәкірттері біртұтас лиганың кезекті турында «Нижний Новгород» клубын ірі
есеппен ұтты. Кездесу басынан тура соққылармен ерекшеленіп, қорғаныста
қателікке бой алдырмаған астаналық команда ойынның алғашқы бөлімінен кейін
55-51 есебімен алға тұрды. Үзілістен соң ұпай санын арттырды. Ал «Астана»
командасының қарқынына төтеп бере алмаған ресейлік клуб 101-79 есебімен ойсырай
ұтылды. Бұл жетістігіне қарамастан, «Астана» командасы турнир кестесінің 12-ші
сатысында қалды.
Самат ҚАНАҒАТОВ