Солтүстік
Қазақстан облысында жолдар көк тайғақ мұзға айналған. Қолайсыз ауа райының
салдарынан қатынас та қиындап тұр. Тайғанақ жолда құлап, жарақат алған адамдар саны соңғы 2 айда күрт
өскен. Дәрігерлердің дерегі бойынша, мұндай оқиғалар былтырғымен салыстырғанда, бір жарым есеге көбейді. Көктайғақтан мезі болған қызылжарлықтардың жанайқайын
аймақтағы әріптесім Абзал Құрманкин тыңдап қайтқан еді.
Алпыстың
асқарына жеткен Лидия әжей серуендеймін деп тайғанап құлап, оң қолын сындырып
алған. Қазір гипспен жүр. Әжей мұндай бейнетке өмірінде алғаш рет тап болғанын
айтады. Өкініштісі сол, қарияның қол сүйегі дұрыс бітпеген, енді мамандар оны
қайта сындырып, орнына салмақ.
Лидия Галицкая:
Айнала
көктайғақ. Жаяу жүргіншілердің жолағына құм мүлдем себілмейді. Адамдар құлап,
дене мүшелерін жарақаттап жатыр. Қазір ауа райы құбылмалы, сондықтан құм-тұзды
көбірек төсеу қажет деп ойлаймын.
Қыс
жақындағалы ақ халаттылардың көмегіне жүгінгендердің қарасы көбейген. Осы айдың
өзінде 460 адам ауруханаға түскен. Дәрігерлер бұл көрсеткіш айдың аяғына қарай
өседі дейді.
Валерий
Грибашов, Петропавл қалалық №3 аурухананың травматолог-дәрігері:
Қала
жолдары көктайғаққа айналған кезде травматологиялық бекеттің жұмысы арта
түседі. Өткен айда біздің көмегімізге шамамен 450 адам жүгінді. Көбінің
қол-аяғы сынған. Бел омыртқасын жарақаттап алғандар да жоқ емес. Алдыңғы жылы
бір тұрғын тіпті тайғанап құлап, ауыр жарақаттан тіл тартпай кетті.
Абзал
Құрманкин, тілші:
Шаһардың
шеткері аудандары түгіл, орталық көшелерінің де жағдайы мәз емес. Мысалы ретінде, мынау Петропавлдың негізгі көшесі
болып саналады. Орта тұсы тазартылған, жаяу қатынауға ыңғайлы. Ал мына жағы
кәдімгі мұз. Адамдар құлап бастарын жарып алмас үшін, ақырын жүруге мәжбүр.
Коммуналдық
қызметтердегілер көктайғаққа дайынбыз дейді. Күні-түні көшеге құм сеуіп
жатқандарын айтып ақталуда. Биылғы қысқа 800 тонна құм сақтапты. Алайда, қар
түскеннен кейін арнайы техника құмды ақ ұлпамен бірге жинап әкетеді деді.
«Қардан күрелген көшелерге құмды қайта себуге коммуналдық қызмет үлгере
алмайды», - дейді жауапты мекеме өкілі.
Ғали
Әбдірәшев, «Петропавл қаласы ТКШ, жолаушылар көлігі және автомобиль жолдары» ММ
бас маманы:
Көліктердің
және адамдардың жолда және тротуарда бөгетсіз жүруі үшін, көктайғаққа қарсы
материалдар себеміз. Жол себу жұмыстары таңғы 5-тен басталады. Ал тротуар
тазалау және көктайғаққа қарсы материал себу күндізгі уақытта өткізіледі.
Көктайғаққа қарсы материалды себу жұмыстарымен 4 фирма айналысады.
Десе
де, коммуналды қызмет құм себілгенімен, көктайғаққа тосқауыл бола алмаймыз
дейді. Сондықтан тұрғындар өз қауіпсіздігін өздері ойлауы шарт екенін ескертті.
Абзал
ҚҰРМАНКИН