«Нұр Отан» партиясы Тәуелсіздік күні қарсаңында
және партияның 15 жылдығы аясында жүзден жүйрік шыққан жастарға «Жас тұлпар»
жүлдесін табыстады. Қоғам қауіпсіздігі үшін басын бәйгеге тіккендер, спорт, өнер
саласында ел абыройын асқақтатып, ұлт мақтанышына айналған бірнеше жан бүгін
салтанатты түрде марапатталды. Жеті аталым бойында үздік шыққандарға жетекші
партия бір млн теңгеден жүлде тапсырды.
«Жас тұлпар» сыйлығы өз кәсібінің жілігін шағып,
майын ішкен, өз саласында биік асуларды бағындырған 35 жасқа дейінгі
жерлестерімізге беріледі. Жүлденің «Жас тұлпар» деп аталуының терең мәні бар.
60-жылдары Мәскеуде қазақ жастары ұлттық сана-сезім мен болмысты ұлықтаған,
тәуелсіздікке ұмтылып, мәдени мұраларды сақтауды мұрат еткен жастар қозғалысын
құрғаны белгілі. Жастарға арналған «Жас тұлпар» сыйлығының идеясы сол ұйымның
атауынан бастау алған. Осылайша, жетекші партия ұрпақтар сабақтастығын ұмыт
қалдырмауға ұмтылып отыр.
Бауыржан Байбек, «Нұр Отан» партиясы төрағасының
бірінші орынбасары:
Елбасы, жастар біздің алтын қорымыз деп, әрқашанда
сіздерге, жастарға, тек қана үміт артып қоймай, жан-жақты жағдай жасап келе
жатыр. Мынау «Нұрлы жол» Елбасы жаңа бағдарламасы жалпы жастарға арналған.
Сонымен спорттағы жетістігі үшін Илья Ильин үздік танылды. Оның әр жеңісі үшін ұлт болып ұйысып қуанатынымыз рас. Ол
тұғырдан көрінген сайын Президенттің өзі құттықтап телефон шалатын бірден бір
спортшы. 2 дүркін олимпиада, 4 дүркін әлем чемпионы небәрі 26 жастағы Ильяға
қазақ еліне қалай еркелесе де жарасады.
Илья Ильин, ауыр атлетикадан екі дүркін олимпиада
чемпионы, «Жас тұлпар» лауреаты:
Всем спасибо за почет и уважение. Скажу одно -
это начало моего пути. Побольше бы нам такой молодежи в Казахстане, и мы бы уже
давно свои цели - в 30-ку лучших стран и все остальное - давно побили бы.
Жақында ғана «Түрквижон» халықаралық байқауында
рухты жырымен түркі әлемін таңқалдырып, қазақ еліне жеңіс сыйлаған Жанар
Дұғалованың еңбегі де елеусіз қалмады.
Жанар Дұғалова, әнші, «Жас тұлпар» лауреаты:
Өнер адамдарына осылай қолдау көрсету шабытымызға
шабыт қосады. Талабымызды ұштай түседі. Әрі қарай да еліміз өркендеу үшін
барымызды саламыз. Әні өзімдікі, сөзін Ринат Заитов аға екеуміз соавтормыз.
-Жүлдемен бөлісесіз бе? -Әрине.
Қазақша мүдірмейтін әріптесімсіз Оксана Петерс те
биіктен көрінді. Төл тіліміздің майын тамызып сөйлейтін ол кейбір қаракөздерге
үлгі болады десек, қателеспейміз.
Оксана Петерс, «Астана» телеарнасы
жүргізушісі, «Жас тұлпар» лауреаты:
Қазақстан - талантты дара тұлғаларға өте бай
мемлекет. Жылдан жылға еліміздің талантты жастары арта берсін. Мемлекетіміз
нығайып, қазақ тілінің қанаты беки берсін. Рахмет, ағайын.
Мөлдір Бақыт-қызы, тілші:
Шынымен-ақ арғымақ жүзден жүйрік мыңнан
тұлпарларға тарту етіледі. Байқап тұрғанымыздай, «Жас тұлпар» сыйлығы Қазақстан
халқының бірлігін нығайтуға, жастардың жан-жақты дамуына және мемлекеттік
тілді, мәдениетті, өнерді, әдет-ғұрыпты, жастар арасында тарихи мұраны
дәріптеуге, Қазақстанның жас патриоты образын қалыптастыруға, сондай-ақ шетелде
Қазақстанның беделін арттыруға үлес қосқан замандастарымызға берілді.
Тағы
кімдер, қандай аталым бойынша жеңімпаз атанды? Салтанатты кешті толығымен алдағы сенбі күні «Астана» телеарнасынан тамашалай
аласыздар.
Мөлдір БАҚЫТ-ҚЫЗЫ