Австралияда
футболдан Азия кубогы жолындағы турнир жалғасуда. Дәрежелі жарыстың екінші
турында сынға түскен Қытай және Сауд Арабиясы құрамалары жанкүйерлерін қуантты.
Спорт тақырыбын Самат Қанағатов толықтырады.
Футболдан
Азия кубогы жолында сынға түсіп жатқан Өзбекстан құрамасы үш ұпайдан құр алақан
қалды. Кезекті турда Миржалол Қасымовтың шәкірттері Қытай командасына жол беріп
қойды. Дегенмен, бұл ойындағы алғашқы голды Өзбекстан футболшылары соқты.
Голдың авторы - Одил Ахмедов. Бірақ, қуаныш көпке созылмады. Қарымта шабуылға
шыққан Аспан асты елінің аяқ доп шеберлері үзілістен кейін У Сидің көмегімен
есепті теңестірді. Бұл голдан кейін шабыттанған Қытай құрамасы кездесудің
аяғына қарай есепті еселеді. Бұл сәтте алыстан мықты соққы жасаған Сунь Кэ
команда қоржынына үш ұпайды салып берді. Бұл
жетістігінен кейін 6 ұпай жинаған Қытай командасы өз тобының көшін
бастады.
«Дакар»
марафонының 10-шы кезеңі Чили мемлекетінің Калама және Сальта қалаларының
арасында жүрді. Бұл сында командалар 350 шақырымға созылған жарыс жолында
мықтыны анықтады. Жол талғамайтын көліктер жарысында сынға түсіп жатқан Айдын Рахымбаевтың
экипажы бұл кезеңді 20-шы орында аяқтады. «Мини»
көлігінің иесі жалпы есепте 10-шы орнын сақтап қалды.
«Тойота»
көлігін мінген Бауыржан Исабаевтың экипажы бұл кезеңді бірқалыпты өткізді.
Жарыс барысында қауіпті учаскелерден аман өткен қазақстандық ұжым жалпы есепте
алғашқы 20 мықтының қатарында қалды. Ал ауыр жүк көліктер жарысында
Қазақстанның намысын қорғап жатқан Артур Ардавичустың экипажы 10-шы кезеңді
12-ші орында аяқтап, жалпы есепте 22-ші орынға тұрақтады.
Самат ҚАНАҒАТОВ