Қазақстандық
теннисші Михаил Кукушкин Австралияда өтіп жатқан халықаралық турнирдің ақтық
сынына жолдама алды. Жартылай финалда еліміздің бірінші ракеткасы Аргентина
спортшысы Леонардо Майерді екі сетте айналып өтті. Спорт жаңалықтарын Самат
Қанағатов жалғастырады.
Футболдан
Азия кубогы жолындағы жарыс жалғасуда. «С» тобында сынға
түсіп жатқан БАЭ құрамасы тағы да үздік шықты. Бұған дейін Қатар командасын айналып
өткен Махди Алидің шәкірттері бұл жолы Бахрейн футболшыларын қапы қалдырды. Бұл
ойындағы алғашқы голды БАӘ аяқ доп шеберлері бірінші таймның алғашқы минутында
соқты. Голдың авторы - Мабхут. Қарымта шабуылға шыққан Ейд
Мерджанның шәкірттері үзіліске дейін есепті теңестірді. Әріптесінің бұрыштан
көтерген пасына биік секірген Оквунванне мүлт кетпеді.
Екінші
таймда қарсыласқа қарағанда алаңда ширақ қимылдаған БАӘ-нің футболшылары
ұрымтал сәттің бірінде есепті еселеді. Бұл жолы допты қайтармақ болған қорғаушы
Хусейн дөрекі қателесті.
Бұл
жетістігінін кейін 6 ұпай жинаған Махди Алидің шәкірттері «С»
тобының көш басына көтерілді. Бұл топтағы келесі ойында Қатар құрамасы Иран
командасын қабылдады. Кездесу тартысты өтті. Бірінші таймда терезесі тең өнер
көрсеткен командалар үзіліске 0-0 есебімен кетті. Екінші тайм басталғаны сол
еді. Жылдам шабуыл ұйымдастырған Карлуш Кейруштың шәкірттері есеп ашты.
Қорғаушылар қателігін сәтті пайдаланған Азмун команда қоржынына үш ұпайды салып
берді.
Сонымен
екі тур барысында ұпайсыз қалған Бахрейн және Қатар құрамалары келесі кезең
жолдамасынан құр қалды.
Самат ҚАНАҒАТОВ