Қазақ
анимациясының атасы Әмен Хайдар өмірден озды. Айрықша өнердің негізін қалаушы
талантты кинорежиссер, суретші 92 жасқа қараған шағында қайтыс болды. Өнер
қайраткерінің тарихта қалған туындылары көп. Барлығымызға
бала күннен таныс «Қарлығаштың құйрығы неге айыр?», «Ақсақ құлан», «40 өтірік»,
«Құйыршық» және басқа да көптеген мультфильмдерде Әмен Хайдардың қолтаңбасы
сайрап тұр.
Ұлттық анимацияның алғашқы қарлығашы болған «Қарлығаштың құйрығы
неге айыр?» мультфильмі Бүкілодақтық кинофестивальде озып шықты. 1975 жылы
Нью-Йоркте өткен Халықаралық анимациялық фильмдер сайысында жүлдегер қатарынан
көрінді. Бұл туынды әлемнің 48 елінде көрсетілген. Талантты график әрі
карикатурашы - 40-қа жуық саяси плакаттың және түрлі тақырыптағы картиналардың
авторы. Әмен Хайдар – Ұлы Отан соғысына қатысқан азамат еді. 1993 жылдан бері
Жүргенов атындағы Қазақ ұлттық өнер академиясында анимация бойынша дәріс берді.
Қазақ қоғамында ойып тұрып орын алған тұлғамен қоштасу ертең сағат он бірде
Ғабит Мүсірепов атындағы жасөспірімдер театрында өтеді.
Дидар
Амантай, «Қазақфильм» киностудиясының бас редакторы:
Әмен
Қайдаров - қазақ анимациясының негізін қалаушы. Ұлы тұлға деп айтуымызға
болады. Ол тұңғыштардың ең соңғы тұяғы. Шакендермен қатар өмір сүрген, Қалибек
Қуанышпаевтармен бірге жұмыс жасаған адам. Ол кісінің орны қашан да бөлек.
Қазақ киносының тариыхында ол кісі мәңгі есте сақталады деген ойдамын.
Берік
ХАСЕНОВ