Президент Нұрсұлтан Назарбаев белгілі жазушы Герольд
Бельгердің қазасына орай қаламгердің отбасына көңіл айту жеделхатын жолдады.
Онда Елбасы жазушының қазасы күллі Қазақстан мәдениеті үшін орны толмас қасірет
болғанын атап өтті,- деп хабарлайды Ақорданың баспасөз қызметі.
«Герольд Карлұлының Қазақстанға деген сүйіспеншілікке
толы ғұмыры шынайы отансүйгіштіктің жарқын үлгісі болып табылады. Оның
шығармашылық мұрасы біздің мәдениетіміз үшін баға жетпес құндылыққа айналды.»,
- деді Президент.
Жазушы, аудармашы Герольд Бельгер Президент істері
басқармасына қарасты Орталық клиникалық ауруханада өткен сенбіде көз жұмды.
Әдебиетке өлшеусіз үлес қосқан қаламгер 60-тан астам кітаптың авторы.
Қазақтың классикалық туындыларын орыс және неміс
тілдеріне аударған қарымды қаламгер болатын. Жазушының 80 жасқа толған
мерейтойы өткен жылы мемлекеттік деңгейде атап өтілді. Марқұммен қоштасу рәсімі
сейсенбі күні Алматыда Мұхтар Әуезов атындағы драма театрының қабырғасында
өтпек.
Базаркүл ОТЫНШИЕВА