Қостанайда мысырлық азаматқа қатысты сот ісі жүруде. 35 жастағы Бассем
Фоули «босқын» мәртебесін беруден бас тартқан ішкі істер департаментінің
шешіміне наразы. Шетелдіктің талап-арызы қалалық сотта қаралып жатыр.
Араб азаматының ресми өкілі ретінде сотқа «Халықаралық адам құқығын қорғау»
бюросының Қостанайдағы директоры қатысты.
Бассем Фоули соттан көші-қон
полициясы басқармасының шешімін заңсыз деп тануды өтінген. Ол Мысырдағы әскери
қақтығыстардан бейнебаян көрсетіп, Отанына оралса, өміріне қауіп төнетінін
айтты. «Мақсатым - «босқын мәртебесін» алып, Қазақстанда қалу», - дейді.
Ал
жауапкер тараптың өкілі Фоулидің бірнеше рет көші-қон заңын бұзып, әкімшілік
айыппұл төлегеніне тоқталды. Сондай-ақ осыған дейін емін-еркін шекарадан
асқанын алға тартады. Ол Қазақстанға осымен жетінші рет келіп отыр. Тіпті
жергілікті қызға үйленіп, аз уақыттан соң ажырасып та үлгерген көрінеді.
Қайрат Дүтпаев, Қостанай ОІІД көші-қон полициясы басқармасының бастығы:
Оның бұрынғы әйелі мен енесінің атынан үш рет шағым түсті.
Шағымданушылар Бассем Фоулидің қол көтеріп, зәбір көрсеткенін жазды. Сонымен
қатар өткен жылы ол бірнеше рет көші-қон заңын бұзғаны үшін, әкімшілік айыппұл
төледі. Осыны ескере отырып, комиссия оған «босқын мәртебесін» беруден бас
тарту туралы шешім қабылдады.
Заңғар САНАЙ