Астанада
жоғалып кеткен студентті іздеуге еріктілер тобы жиналып жатыр. Медицина
университетінің 6 курс тәлімгері 23 жастағы Ерасыл Әубәкіров 3 күннен бері
хабар-ошарсыз кеткен. Жігіттің туыстары мен достары қаладағы аурухана мен
мәйітхананы да түгел аралап шығыпты. Іздестіру шарасына полицияның жедел қызметі
де кірісті. Тақырыпты тілші тарқатсын.
Осымен
3-ші тәулік Ерасыл Әубәкіровті группаластары тыным таппай оны іздеумен жүр.
Қоғамдық орынның бәріне де суреті ілініп, шұғыл хабарлама қалдырып жатыр.
Әлеуметтік желіде де таратылып жатқан ақпар көп. Соңғы рет достары Ерасылды
2-ші ақпанда сабаққа келгенде көрген екен.
Диас
Жұмаділов, Е.Әубәкіровтің досы:
Сәрсенбі
күні кешкі 6-да Ерасыл «бір жұмыстарыммен кеттім» деп үйінен шығыпты. Содан
оралмаған. Енді жас болған соң қыдырып кеткен шығар дедік. Бірақ келесі
күні топографиялық анатомиядан емтихан тапсырумыз тиіс еді. Оған ол қатты
дайындалған. Келмеуі күдік тудырды. Ерасыл - өте жауапты жігіті. Өскемендегі
ата-анасының үйіне де бармаған.
23
жастағы Ерасыл Әубәкіров Астана медицина университетінің 6 курсында интернатурада оқиды екен. Досы Диастың айтуынша, Астанада ет жақын туыстары
жоқ. Сондықтан бірнеше жолдасымен бірге пәтер жалдап тұрған. Мінезі жарқын жігіттің ешкіммен жауаласып,
қастасатындай қылығы да болмапты.
Диас
Жұмаділов, Е.Әубәкіровтің досы:
Ешқандай
жанжалға, ұрыс-керіске бармайтын жігіт. Жақын досымын ғой, бір қиындығы болса, маған айтар еді. Біз аурухана мен мәйітхананы да түгел сұрастырып, қарап
шықтық. Бүгін енді Ерасылдың туыстары Астанаға келе жатыр. Досымызды көрген
адамдар болса, хабарлассыншы.
Қазір
жоғалған студентті полиция да іздеуге кіріскен.
Мадина
Дүйсенбаева, Астана қалалық ІІД-нің қызметкері:
Кеше
4 ақпан күні Астана қаласының ІІД-нің жедел іздестіру орталығына досының
жоғалып кеткендігі жөнінде хабарлама айтып, бір азамат хабарласты. Қазіргі
таңда жедел іздестіру шарасы жүргізілуде.
Барлауға
қарағанда, жігіттің ұялы телефоны сәрсенбінің кешінен кейін мүлдем қосылмапты.
Қазір жоғалған студентті іздеуге медицина университетінің тәлімгерлері мен
ерікті жастар тобы тартылып жатыр.
Құралай ПИОНЕР