Президенттікке
кандидат Әбілғазы Құсайынов Атырау өңірін аралап, гуманитарлық колледж ұжымымен
кездесті. Үміткер сайлауалды тұғырнамасын таныстырып, оның негізгі бағыты -
экология мәселесі жайында баяндап берді. Сондықтан үміткердің Астана қаласы мен
Ақмола облыстық штабының мүшелері үгіт-насихат кезінде экологиялық ахуалға
басымдық береді.
Әлем бойынша топырақтың тозуынан жылына 7 млн гектарға жуық құнарлы жер ауыл
шаруашылығы айналымынан шығады. Қоршаған ортаның ластануы барған сайын өткір
тақырыпқа айналып барады. Сондықтан бүгінгі таңда экологияны биологияның
бөлігі ретінде ғана емес, неғұрлым кең мағынада қозғау қажет, - дейді Әбілғазы
Құсайынов.
Әбілғазы
Құсайынов,
Қазақстан Республикасы Президенттігіне кандидат:
Соңғы 100 жылда адамның
тұрмыс-тіршілігінен туындаған жағымсыз экологиялық ахуал қазір адамның өзіне,
денсаулығы мен өміріне зиянын тигізіп отыр.
Кандидаттың айтуынша, қазір
жердің ауа кеңістігі қатты ластанып отыр. Жердегі барлық тіршілік иесінің өмірі, ең алдымен, ауаның ластану деңгейіне тәуелді. Ал ауа бассейнінің жағдайы
нашарлап барады, дейді Әбілғазы Құсайынов. Ауыз су қорының азаюы да - өзекті
мәселенің бірі. Ауыз су тапшылығы болашақта үлкен экологиялық апатқа айналуы
мүмкін екенін айтады үміткер. Кандидаттың экологиялық ахуалды негізге алған сайлауалды
тұғырнамасын аймақтағы штаб мүшелері де кеңінен насихаттап жүр.
Ербол Жексенбаев, ҚР Президенттігіне үміткер
Ә.Құсайыновтың Астанадағы сенімді өкілі:
26
наурыздан бастап үгіт-насихат жұмыстарын бастадық. Бүгінгі күнде Астана қаласы
бойынша Әбілғазы Құсайыновты қолдау мақсатында
белгіленген орындарға 4 билборд пен плакаттар ілінді. «Астана
көгалдандыру»
АҚ мен «Тұран»
университетінде сайлаушылармен кездесулер болды.
Жұмыс
Ақмола облысындағы сайлауалды штабта да қызған. Әрбір ауданда сенімді өкілдер
белгіленген. Олар Бурабай ауданы Щучье қаласындағы жоғарғы техникалық мектептің
студенттерімен кездесті.
Азамат Құсайынов, ерікті:
Мен
биыл сайлауға алғаш рет қатысқалы тұрмын. Қазір кандидаттың үгіт-насихат
парақшаларын ілуге көмектесіп жүрмін. Маған ол кісінің сайлауалды тұғырнамасы
ұнайды.
Экология адамның қоршаған ортамен өзара
іс-қимыл жасау проблемасын зерттейтін пәнаралық ғылымға айналуға тиіс, дейді
штаб өкілдері. Олар өз кандидаттарының үгіт-насихат науқанын әрбір сайлаушыға
жеткізуге дайын.
Айгүл ӘДЕПБАЙ