Орталық
сайлау комиссиясынан ең соңғы деректер... Комиссия төрағасы Қазақстанда
кезектен тыс өткен президенттік сайлаудың алдын-ала нәтижелерін жариялады.
Соған сүйенсек, сайлауда іс басындағы мемлекет басшысы 97,7 пайыз дауыс жинады.
Орталық сайлау комиссиясы төрағасының сайлау нәтижелері туралы мәлімдемесін
келтірейік.
Қуандық
Тұрғанқұлов, ҚР Орталық сайлау комиссиясының төрағасы:
Сайлаудың алдын-ала нәтижесі
туралы айтатын болсақ, бізге келіп түскен ақпарат бойынша Республикада
сайлаушылар дауысы былай бөлінді. Әбілғазы Әлиақпарұлы Құсайынов үшін
сайлаушылардың 0,7 пайызы дауыс берді. Нұрсұлтан Әбішұлы Назарбаев үшін - 97,7
пайыз, Тұрғын Ысқақұлы Сыздықов үшін - 1,6 пайыз.
Өз
сөзінде, ОСК төрағасы 14 облыстан, Астана және Алматы қалаларынан хаттамалар
Орталық сайлау комиссиясына әлі де түсіп жатқандықтан бұл деректер
нақтыланатындығын атап өтті. Қуандық Тұрғанқұлов хаттамаларды түгендеуге заң
бойынша екі күн белгіленгенін айтты. Сондай-ақ, бүгін комиссия сайлаушылардың
белсенділігі бойынша да мәліметті жариялады. Кезектен тыс президенттік
сайлауда сайлаушылардың 95,22 пайызы
дауыс берген. Сайлау комиссиясы төрағасы бұл көрсеткішті тарихи рекордқа
жатқызып отыр.
Қуандық
Тұрғанқұлов, ҚР Орталық сайлау комиссиясының төрағасы:
26 сәуір сайлаушылар өздерінің
айрықша азаматтық ұстанымын, электораттық белсенділігін және елдің болашағы
үшін саяси жауапкершілігін айқын көрсетті. Егемен Қазақстан тарихында дәл осындай белсенділік бірінші рет болып отыр. Науқанды ұйымдастырудың жоғары деңгейіне байқаушылар мен сарапшылар көз жеткізіп, баса назар аударды.
Жұрағат БАМАН