Шетел лидерлері Мемлекет
басшысын сайлаудағы жеңісімен құттықтап жатыр. Ақорданың баспасөз қызметі
хабарлағандай, бүгін Нұрсұлтан Назарбаевтың атына Түркия президентінің
жеделхаты келді.
Реджеп Тайып Ердоған түрік
халқының және жеке өзінің атынан Нұрсұлтан Назарбаевты президенттік сайлаудағы
жеңісімен құттықтады.Сонымен қатар, жуырдағы
Қазақстанға жасаған мемлекеттік сапарында көрсетілген құрмет пен
қонақжайлық үшін мемлекет басшысына ризашылығын білдірді.
Қытай Халық Республикасының
Төрағасы Си Цзиньпин де Нұрсұлтан
Назарбаевты 26 сәуірде өткен сайлаудағы жеңісімен құттықтады. Айта өтейік, екі
ел басшысы телефон арқылы тілдесті. Қытай лидері Қазақстан Президентінің
тәуелсіздікті нығайтуға және елдің орнықты дамуына қосқан үлесін жоғары
бағалады. Әңгіме барысында екіжақты ынтымақтастық жайы да сөз болып, соңында Си
Цзиньпин Қазақстан Президентін биыл өз еліне сапарлауға шақырды. Айта кетейік,
Қытай басшысының өзі мамыр басында Астанаға келеді.
Елбасы Малайзия премьер-министрімен
де телефон арқылы сөйлесті. Наджиб Тун
Разак Нұрсұлтан Назарбаевты сайлаудағы тарихи жеңісімен құттықтады. Мемлекет
басшысы атына сондай-ақ Ресей Федерациясы Үкіметінің төрағасынан құттықтау жеделхаты түсті. Дмитрий Медведев қазақстандық
серіктестерімен кооперациялық байланыстарды дамыту үшін жаңа мүмкіндіктер
ашатын Еуразиялық экономикалық одақ аясындағы өзара ықпалдастықты жандандыруға
әзір екенін білдірді.
Ләйлә ҚАЗИЯҚПАРОВА