Теннистен Ұлыбритания ашық чемпионаты басталды. Екі апта бойы әлемнің үздік спортшылары өзара сынға түсіп, бас жүлдені сарапқа салады. Дүбірлі жарыста ел намысын қорғап жатқан Зарина Дияс пен Юлия Путинцева екінші кезеңге шықты.
Футболдан Чили құрамасы Америка кубогының ақтық сынына жолдама алды. Жартылай финалда Перу командасымен сынға түскен Хорхе Сампаолидің шәкірттері 2-1 есебімен басым түсті. Бірінші таймның 20-шы минутында Перу қорғаушысы Карлос Самбрано-Чарлес Арангисаға қарсы дөрекі ойнады. Бұл сәтті көзден таса жібермеген бас қазы бұзақыға қызыл қағаз көрсетіп, алаңнан қуды. Сан басымдығын пайдаланған алаң иелері үзіліске дейін есеп ашты. Голдың авторы Эдуардо Варгас.
Қарымта шабуылға шыққан Рикардо Гареканың шәкірттері екінші таймның басында таразы басын теңестірді. Допты қайтармақ болған Чили командасының қорғаушысы Гари Мендель допты өз қақпасына соғып алды. Дегенмен, жанкүйерлері алдында намысқа тырысқан алаң иелері араға 4 минут салып есепті еселеді. Бұл жолы алыстан мықты соққы жасаған тағы сол Варгас командасын ақтық сынға алып шықты.
Енді финалда Чили құрамасы-Аргентина және Парагвай командалары кездесуінің жеңімпазымен бас жүлдені сарапқа салады.
Теннистен «Уимблдон» турнирі басталды. Дәрежелі жарыста сынға түсіп жатқан Сербия теннисшісі Новак Джокович екінші кезеңге шықты. Бірінші айналымда әлемнің бірінші ракеткасы-Германия спортшысы Филипп Кольшрайбермен кортқа шықты. Кездесу басынан ойын тізгінін толығымен қолына алған сербиялық бірінші сетте 6-4 есебімен басым түсті. Үзілістен кейінде алған бетінен қайтпаған Новак Джокович ұпай санына арттырды. Өз кезегінде жиі қателесіп, қарсыласының қарқынына төтеп бере еламаған Германия спортшысы аяғы жеңілісін мойындады. Қорытынды есеп 6-4,6-4,6-4.
Әйелдер жарысының басты фавориті саналатын Серена Уильямс екінші айналымға сүрінбей өтті. Алғашқы кезеңде Ресей спортшысы Маргарита Гаспарянмен кортқа шыққан әлемнің бірінші ракеткасы қатарынан екі сетте жеңіске жетті.
Самат ҚАНАҒАТОВ