Қостанай облысында топырақ астында қалған жасөспірімнің өліміне жауаптылар жазаға тартылсын. Бар-жоғы 17 жастағы марқұмның, әкесі осыны талап етеді. Колледж студенті көп балалы отбасының тұңғышы. Ол ауылда ауыз су тартып жатқан мердігер кәсіпорынға жұмысқа тұрғанына көп болмаған. Ауыл адамдарының айтуынша оны шұңқырға экскаватор абайсызда қағып құлатқан. Қайғы жамылған әке «мердігер өкілдері баламды өзі құлағандай етіп көрсетуге тырысты» дейді.
Сапарбек ТӨЛЕПБЕРГЕНОВ, МАРҚҰМНЫҢ ӘКЕСІ:
Ковщикпен бұрылып сеуіп жатқан бетте баланы қағып жіберген бастан. Ол анық көрініп тұр қаққаны. Бірақ енді құлап қалды, қазып алдық деп айтып жатыр. Бұл дұрыс емес негізі. Ешкім қоршамаған. Балалар жүгіріп қарғып жүр мысалы. Сол үлкен бастықтары қайда қарап жүр. Прораб жоқ оның басында.
Қайғылы жағдайдан кейін ғана мердігерлер қазылған орларды ала жіппен қоршап, құдықтарды жауыпты. Кемшілігін кеш түсінген кәсіпкер, енді қылмыстық кодекстің 156 бабының 3 бөліміне сәйкес жауапқа тартылмақ. Егер кінәсі дәлелденсе 5 жылға дейін бас бостандығынан айрылуы мүмкін.
Мұхтар ЖАЙЛАУБЕКОВ, ҚОСТАНАЙ АУДАНДЫҚ ПОЛИЦИЯ БӨЛІМІНІҢ БАСШЫСЫ:
Кәсіпкерге қатысты қылмыстық іс қозғалды. Су құбырын жүргізіп жатқан мердігердің өзі, жеке кәсіпкердің өзі сол еңбекті қорғау қағидаларын бұзғаны үшін жауапқа тартылады.
З. Санай