Ақтөбеде ұлттық әшекей бұйымдар көрмесі өтті. Оны "Шолпы" клубы ұйымдастырған. Бұл ұйым қыз балаларды әдет-ғұрып, салт-дәстүрге баулиды. Оған мүше аға буын өкілдері көрмеге мектеп оқушыларын шақырып, қазақтың әшекей бұйымдарының тәрбиелік мәні жөнінде әңгімелеп берді. «Шолпы, шашбау, білезік пен сырға -сұлулықтың ғана емес, сыпайылықтың да символы. Халқымыз сондай-ақ шаштың ұшына байланатын әшекейлер жын-шайтанды қуып, тіл-көзден сақтайтынына сенген», - дейді олар.
Бибігүл СЕЙІТОВА, «ШОЛПЫ» КЛУБЫНЫҢ МҮШЕСІ:
Қазақ халқының даналығы сондай, күміс шолпы арқылы қыздардың бойын түзу ұстауы, әдемі ұстауы, яғни шылдырлағанын білдіртпей жай жүруі - қыз баланың тәрбиесіне үлкен мән берген.
Батыс өңірінің әйелдерге арналған әшекей бұйымдары - зергерлік өнердің ерекше бағыты іспетті. Көне әшекейлер топтамасы облыстық тарихи-өлкетану музейінде көпшіліктің наразына ұсынылды. Мұнда 19-ғасырда қазақ қыздары шашына таққан шолпы сақтаулы. Күмістен жасалған бұйым өте әдемі, салмағы -3 келі. Ал, күміспен күптеліп, асыл тастармен көмкерілген өңіржиектің музейде түр-түрі бар.
Алмагүл САРЫБАЙ, АҚТӨБЕ ОБЛЫСТЫҚ ТАРИХИ-ӨЛКЕТАНУ МУЗЕЙІНІҢ ҚЫЗМЕТКЕРІ:
Бой жетіп, тұрмысқа шығатын қыздар, кей жерлерде келіншектер осы үш тақтадан тұратын өңіржиектерді таққан. Ал, енді ол үлкен ана болып, олардың баласы көп болсын, өсіп-өне берсін деген мақсатта олар осындай бірнеше тақтадан тұратын өңіржиектерді таққан екен.
Г. Сейтенова