Оралда әлеуметтік осал топқа жататын 200-ге жуық адам үй кезегінен негізсіз шығарылған. Ал оларға тиесілі баспананы шенеуніктер басқаға берген. Амалын тапқан пысықтар меншігінде үйі болса да, пәтерге мұқтаж жандардың кезегіне кезектен тыс кіріпті. Осының кесірінен тағдыр тәлкегіне түскен жетімдер есейіп, отбасын құрса да, балаларымен бірге жетімдіктің тауқыметін әлі тартып отыр.
Әсел Антаева қуықтай бөлмеде үш баласымен он бір жылдан бері тұрады. Сол кезде баспана кезегіне 597-болып тіркелген. Қазір 170-орында.
Әсел АНТАЕВА, ОРАЛ ҚАЛАСЫНЫҢ ТҰРҒЫНЫ:
Біздер әкімге де бардық, қала әкіміне де бардық. Қала әкімдерінің орынбасарларының барлығына да бардық. Мында өте нашар условия, мұнда жуынатын жер жоқ. Көріп отырсыз ғой, осы жерде тамақ ішіп, осы жерде сабақ істейді қызым. Күн түспейді біздің бөлмеге, сыростьтан балам ауырады. Кашель уже, ауырады кәдімгідей. Қызымның бүкіл кітаптары су болады.
Балалар үйінің түлектері «Шаңырақ» жасөспірімдер үйінде 23-ке дейін тұра алады. Бірақ көбінің жасы әлдеқашан асып кеткен, арасында тіпті 50-ді еңсергендері бар. Өйткені олардың баратын басқа жері жоқ. Сондықтан үй кезегін ондаған жыл күтуге мәжбүр. Бірақ жетімнің несібесіне жармасқан жергілікті шенеуніктер берілер пәтерді ханталапайға салған.
Әлия ДЕНИЗБАЕВА, БҚО СЫБАЙЛАС ЖЕМҚОРЛЫҚҚА ҚАРСЫ ҚЫЗМЕТТІҢ БАСҚАРМА БАСШЫСЫНЫҢ ОРЫНБАСАРЫ:
Әлеуметтік осал топқа жататын 200-ге жуық адамның негізсіз есептен шығарылып тасталғандары анықталды. Олар яғни, жетім балалар, көпбалалы отбасылар, толық емес отбасылар. Барлық кезектен шығарылған азаматтардың кезегін қалыпқа келтіру бойынша тиісті шаралар қабылданды. Мемлекеттік органдарға тиісті ұсынымдар берілді. Олардың нәтижесі бойынша, ұсынымдарды орындау бойынша нақты шаралар қабылданды.
Шенеуніктердің шарапатына кенеліп, кезектен тыс үй алған 169 адамның кім екені белгісіз. Сыбайлас жемқорлыққа қарсы қызметтің дерегінше, бұл аздай пәтерге мұқтаж емес тағы 247 адамға баспана беріліпті. Ал облыста 1800 жетімек үмітін үзбей, үй кезегін күтіп жүр. Олардың несібесіне ортақтасып, үйді басқаға берген шенеуніктер тек тәртіптік жазамен құтылуы мүмкін.
Е. Карин