Павлодарда мәдениет басқармасының басшысы Самал Бегалинова 3 жылға сотталды. Ол Әлихан Бөкейхановтың мүсінін орнатуға арналған тендерді жеңіп алған кәсіпкерден 1 млн. теңге пара алған. Сот барысында басқарма басшысы кінәсін толық мойындады. Айтуынша, ол қомақты қаражатты Нұр-Сұлтан қаласынан пәтер алу үшін алғашқы жарна ретінде жұмсамақ болған. Сот оның кәмелетке толмаған екі баласының бар екенін ескере отырып, жазасын 5 жылдан кейін өтеуге үкім шығарды. Сондай-ақ, өмір бойы мемлекеттік қызметте және жергілікті өзін-өзі басқару органдарында қызмет ету құқынан айырды.
Әсемқоңыр САЙРАН, ПАВЛОДАР ҚАЛАЛЫҚ № 2 СОТЫНЫҢ СУДЬЯСЫ:
Сот Самал Бегалинованы ҚР Қылмыстық кодексінің 366-бабы, екінші бөлігі бойынша кінәлі деп таныды. Оған 3 жыл мерзімге бас бостандығынан айыру түрінде жаза кесті. Және де сыбайлас жемқорлыққа қарсы агенттіктің облыстық департаментіндегі заттай дәлелдемелерді сақтау камерасында тұрған 1 миллион теңгені тәркілеу туралы үкім шығарды. Үкім заңды күшіне енген жоқ.
Ө. Қуанар