Сирияда
террорлық топқа мүшелік еткен Марат Өмірзақовқа қатысты сот үкімі шықты. Теріс
ағымды ұстанған Солтүстік Қазақстан облысының тұрғыны 7 жылға бас бостандығынан
айырылды.
Петропавл қалалық соты берген мәліметке сәйкес, Марат Өмірзақов 2012
жылы Сирияға заңсыз жолмен өткен. Ол үкіметке қарсы террорлық актілерді
ұйымдастырған «Аль-Мухаджерин Валь-Ансар» атты топқа мүшелік еткен. Судьяның
айтуынша, сотталған азамат террорлық актілерге тікелей қатыспаса да, аталған
ұйымның шекарасын күзетіп, барлау жұмысын жүргізген. 2015 жылы Түркияға жасырын
жолмен өтіп, осы елдің миграциялық заңын бұзғаны үшін құрықталған болатын.
Кейін 2016 жылдың 14 қаңтарында Қазақстанға депортацияланды.
Михаил
Гусев, Петропавл қалалық сотының судьясы:
1969
жылғы Өмірзақов Марат Ескендірұлын Қазақстан Республикасы Қылмыстық кодексі
233-бабының 2-бөлімі бойынша кінәлі деп табылып, 7 жылға бас бостандығынан
айырылсын. Сотталған азамат жазасын жалпы тәртіптегі колонияда өтесін. Дәйек
заттар ретінде қолданылған дискілер мен газеттің көшірмелері қылмыстық істің
ішінде сақталсын.
Ал
Өмірзақовтың қорғаушылары сот үкімімен келіспейтіндіктерін айтады. Адвокаттың
пайымдауынша, сотталған азамат Сирияға мүлдем аяқ баспаған. Жақтаушы тарап
Марат Өмірзақовқа тағылған кінә негізсіз деп отыр.
Қуандық
Мұхамедьяров, Марат Өмірзақовтың адвокаты:
Куәгерлер
ретінде сотталып кеткен кісілерді алған. Басқа дәлелдемелері жоқ. Одан басқа
қылмыстық істе Марат Өмірзақовтың қолында Ислам дінін насихаттайтын материалдар
табылды делінген. Бірақ бұл басылымдар заңсыз деп танылмаған. Біз соттың
үкімімен келіспейміз. Апелляциялық сотқа арыз жазамыз.