Президент
Нұрсұлтан Назарбаев Рио Олимпиадасының жүлдегерлерімен кездесті. Елбасы жоғары
нәтиже көрсеткен саңлақтарға сый-сияпат ұсына отырып, күміс жүлдегерлер Василий
Левит пен Әділбек Ниязымбетов те алтын медальға лайық екенін айтты. Сондықтан
Президент оларды «алтын» медаль иегерлері ретінде марапаттады. Спорт
қаһармандары сондай-ақ Елордадағы «Бәйтерек» маңында халықпен жүздесіп, Астана
көшелерімен шерулетіп өтті.
Олимпиада
жеңімпаздары - ұлт мақтанышы! Осындай жазуы бар автобустармен келген чемпиондар
тағатсыздана күткен халықтың ортасында тартынып қалған жоқ. Бірі жанкүйерлермен қауышып, енді бірі
қолтаңбасын беріп, суретке де түсіп жатты. Осылайша ел мақтаныштары халықтың
ыстық ықыласына бөленді.
Елдос
Сметов, Рио Олимпиадасының күміс жүлдегері:
Осындай елім барда, неге күреспеске? Сондықтан бірінші
Елбасына арнап, тәуелсіздіктің 25 жылдығына арнадық, рахмет барша қазақ еліне.
Әділбек
Ниязымбетов, Рио Олимпиадасының күміс жүлдегері:
Енді финалдық кездесуді бәрі көрді, қолдан келгеннің бәрін істедім. Күміс
бұйырды тағы да, бұл Алланың бұйыртқан орыны шығар деп ойлаймын.
Мұнан
соң көк байрақты қолына мықтап ұстаған қаһармандар Астана көшелерін көлікпен
аралауға және Елбасымен жүздесуге аттанып кетті.
Бұл
маңызды кездесуде спортшылар мойындарына медаль тағынған сәттен де артық
толқыған сыңайлы. Президент әр жеңістің
артында ерен еңбек жатқанын, талай төрдің төгілгенін жақсы білетінін айтты. Сол
үшін де барша Қазақ елінің атынан қаһармандарымызға алғысын жеткізді.
Нұрсұлтан
Назарбаев, Қазақстан Республикасының Президенті:
Рио
де Жанейродағы жарқын жеңістер жастардың жігерін жандырып, жаңа белеске
жетелеп, көп жастарды спортқа ынтықтыратын болды. Асқақ армандарға бірге
ұмтылған тілегі ортақ, мақсаты бір халқымыздың сенімі нығая түсті. 16 млн
халқымыздың 25 жылдық мерейтойымызда 17 медаль тамаша тарту болды.
Сондай-ақ
Президент алтын медаль иегерлеріне, күміс жүлдегерлер Әділбек Ниязымбетовке
және Виталий Левиттің төсіне 2- дәрежелі
«Барыс» орденін тақты. Олимпиададан күміс әкелген өзге саңлақтарға «Парасат»
ордені және қола жүлдегерлерге «Құрмет» ордені табысталды. Жеңісті, жарқын
күндер әлі алда, ол күндерді жақындатуға барлық мүмкіндіктер жасалады, - деді
Елбасы.
Президенттің
олимпиада қаһармандарын қабылдау салтанатынан дайындалған арнайы шығарылымды
ертең сағат 15.15.- те "Астана" арнасынан тамашалай аласыздар. Жіберіп алмаңыздар.