Қарағандылық азамат өзінің заңды некедегі әйелін жезөкшелікпен айналысуға мәжбүрлеген. Бұл туралы Астана телеарнасына жақынынан қорлық көрген 36 жастағы Надежданың өзі мәлімдеді. Талай рет жыныстық құлдықтан қашқан әйел күйеуінің кінәсін дәлелдей алмай сандалып жүрген көрінеді. Құқық қорғау органдары қылмыстық іс қозғағанымен кейін тергеуді тоқтатып тастаған. Надежда енді Бас прокуратурадан көмек сұрайды. Экшн-фильмге ұқсас оқиғаның мән-жайын Айжан Қуаш тарқатады.
Надежданың айтуынша, заңды некедегі күйеуі «балаңды тартып аламын» деп қорқытып жезөкшелікпен айналысуға мәжбүрлеген. Оның үстіне ер адам әйелді «ақша ұрлады» деп айыптап полицияға ұстатып отырған. Надежданың ата- анасы да, жақыны да жоқ. Алғашқы жұбайынан ажырасқан соң біреулер жұмыс берем деп алдап қыстаққа алып кетеді. Еңбек құлдығынан әрең құтылып, баласымен жақсы өмір сүре бастаған кезде қазіргі күйеуімен танысқан. Сөйтсе ол әйелдікке емес, сексуалдық құлдыққа алыпты.
Надежда, ЖӘБІРЛЕНУШІ:
Екеуміз қосылған күннің ертеңінде- ақ ол мені сата бастады.Баламды өзінің әпкесінің үйіне апарып тастады. Менің еш амалым қалмады. Егер көнбесең қазір қамқоршылық органды шақырам олар балаңды алып кетеді деді. Бірнеше рет қашып кеттім, күйеуім полицияға мені ұстату үшін «ақшамды ұрлады» деп арыз жазып тауып алды. Полиция «күйеуіңмен татуласпасаң қылмыстық іс қозғалады» дейді. Менің сөзіме ешкім сенбеді.
Осылайша 1 жыл бойы сексуалдық құлдықта болған Надежда ақыры амалын тауып баласымен қашып кетеді. Содан кейін ғана «жезөкшелікпен айналысуға тарту» бабымен қылмыстық іс қозғалып, бірақ артынша ол істі полиция мен прокуратура жауып тастаған.
Нұрсұлтан ТАМАБАЕВ, ҚАРАҒАНДЫ ОБЛЫСЫ ПРОКУРОРЫНЫҢ КӨМЕКШІСІ:
Сотқа дейінгі тергеп-тексеру нәтижелері бойынша жәбірленушінің жұбайы болып келетін азамат аталған қылмыстық істі жасағаны туралы жеткілікті дәлелдердің болмауына байланысты қылмыстық қудалау органымен қылмыстық іс тоқтатылды. Қылмыстық процессуалдық кодекстің 201- бабының талаптарына сәйкес қылмыстық іс материалдарындағы өзге мәліметтер процеске қатысушылардың жеке өмірін қозғайтын болғандықтан жария етілуге жатпайды.
Надеждаға «Мейірім әлемі» мекемесі қол ұшын созған. Әйелдің онкологиялық ауруға шалдыққаны анықталды. Соған қарамастан жұмысқа орналасты. Заңгерлердің айтуынша, адам саудасының құрбандары әдетте әділдікке жете алмай жарты жолда қалады. Өйткені қорқыту, ізіне түсу, қуғындау, оның үстіне құқық қорғау органдары тарапынан қолдаудың болмауы үміттерін үзеді дейді, - мамандар.
Татьяна АБРАМОВА, ЗАҢГЕР, «МЕЙІРІМ ӘЛЕМІ» ЖОБАСЫНЫҢ ҮЙЛЕСТІРУШІСІ:
Бұл - кәдімгі қылмыстық іс, қылмыс. Ендеше неге күш көрсеткен адам жауапқа тартылмайды. Яғни, ол өзіне ештеңе болмайтынын біледі. Сондықтан ол заңды өз пайдасына асырып отыр. Мұндай жағдайды құқық қорғау органдары ескеруі керек.
Надежда, ЖӘБІРЛЕНУШІ:
Бас прокуратурадан бұл істі анықтап, күйеуімді жауапқа тартуды сұраймын. Мені ешкім тыңдамайды, тек оған ғана сеніп отыр. Мен балам үшін қатты қорқамын. Ол менің ізіме түсіп алды.Қайда барсам да тауып алады. Қайта-қайта полицияға үстімнен арыз жазады.
Надежда күйеуінің бұрын сотталған адам екенін біледі. Әйелдің ізіне түсіп қудалауын қоймаған. Оның үстіне жеңгетайлығын дәлелдейтін куәгерлер жеткілікті деп отыр. Ендеше қылмыстық істің неге жабылып қалғаны түсініксіз.