Қытай бірнеше жыл бойы қайта пайдалануға болатын ғарыш аппаратын жасап келеді және қазірдің өзінде біраз табысқа жеткен, деп жазды massaget.kz.
Shenlong ("Құдай айдаһар") деп аталатын кеме орбитада 276 күн өткізгеннен кейін жақында екінші сынақ ұшуын аяқтады. Ақпаратты Қытайдың аэроғарыштық ғылым және технология корпорациясы (CASC) да растады.
Бірақ миссия, ғарыш аппараты және бір жылға жуық эксперименттік ұшу кезінде жүргізілген процестердің егжей-тегжейі айтылмаған.
Қытайдың Chongfu Shiyong Shiyong Hangtian Qi (CSSHQ) ғарыш кемесі 2020 жылдың қыркүйегінде сынақтан өтіп, Жерге сәтті қонғаны бұрын хабарланған болатын. Журналистердің айтуынша, бұл кеме Shenlong деп аталады.
Америкалық SpaceNews журналы осы миссия туралы қолда бар барлық ақпаратты талдап, CCSHQ кеменің ұшу кезінде көптеген орбиталық маневрлер жасап, Шыңжаңдағы Лоп-Нұр әскери базасына қонғанын жазған.
2022 жылдың тамызында 90 күндік ұшудан кейін бұл құрылғы орбитаға шағын спутник шығарған. АҚШ ғарыш күштері (USSF) алған бақылау деректері аталмыш кеме Boeing X-37B ұшағына ұқсайтынын айтады.
Мұның бәрі Қытайдың SpaceX жүйесіне ұқсас өте ауыр зымыран жасау бағдарламасының бір бөлігі болуы мүмкін деген болжам бар. Зымыран тұжырымдамасы 2021 жылдың сәуірінде ұсынылған.
Бейжің сондай-ақ Tengyun ("Аспандағы шабандоз") деп аталатын тағы бір қайта пайдалануға болатын ғарыш аппаратын жасап жатыр. Оның тұжырымдамасы 2021 жылы Airshow China көрмесінде таныстырылған.