Қырғызстан Республикасының Баткен қаласында Қырғызстан Республикасы мен Тәжікстан Республикасының үкіметтік делегацияларының топографиялық жұмыс топтары қырғыз-тәжік мемлекеттік шекарасының 43,32 шақырымы жөнінде келісімге келді.
Қырғыз Республикасы Министрлер Кабинетінің баспасөз қызметі хабарлағандай, келісімге сәйкес, 2023 жылғы 3-8 қазан аралығында Қырғыз Республикасының Баткен облысының Баткен қаласында топографиялық жұмыс топтары мен қырғыз-тәжік мемлекеттік шекарасын делимитациялау және демаркациялау бойынша Қырғыз Республикасы мен Тәжікстан Республикасының үкіметтік делегацияларының құқықтық мәселелері бойынша жұмыс топтарының кезекті кездесуі өтті.
Достық пен өзара түсіністік жағдайында өткен кездесу қорытындысы бойынша тиісті хаттамаға қол қойылды. Тараптар келесі кездесуде қалған бағыттарды сипаттау жұмысын жалғастырады, бұл кездесу Тәжікстанда өтеді.
Бұған дейін хабарланғандай, 2 қазанда Қырғыз Республикасы ҰҚК төрағасы Камчыбек Ташиев пен Тәжікстан Республикасының ҰҚК төрағасы Саймумин Ятимовтің жетекшілігімен Баткенде Қырғызстан мен Тәжікстан үкіметтік делегацияларының қырғыз-тәжік мемлекеттік шекарасын делимитациялау және демаркациялау мәселелері бойынша бірлескен отырыс өтіп, шекаралық мәселелердің барлығын шешуге негіз беретін тағы бір хаттамаға қол қойылды.