Отбасымен Түркияға саяхаттамақ болған елорда тұрғыны алаяқтың арбауына түскен.
Бұл туралы Caravan.kz медиа порталы Polisia.kz-ке сілтеме жасап хабарлайды.
Астана қаласы Сарыарқа ауданы ПБ криминалдық полиция бөлімінің қызметкерлері алаяқтық жасаған 44 жастағы елорда тұрғынын анықтаған.
Тергеу барысында қаскүнемнің Түркияға отбасымен демалуға жолдама беремін деген сылтаумен қомақты ақша иемденгені анықталған. Елорда тұрғынынан 2,8 млн теңгеден астам қаражатты толық көлемде алып, ұмытылмас демалыс ұйымдастыруға уәде берген алаяқ өтініш білдірген клиентті демалыссыз қалдырған. Алданған азамат амалы қалмаған соң, тәртіп сақшыларына арызданған.
Анықталған азаматшаның бұрын қылмыстық жауапкершілікке тартылғаны белгілі болған. Ол бұрын туристік компанияда қызмет атқарған. Клиенттермен қалай сөйлесу керектігін жақсы меңгеріп, демалыс орындары туралы толық мағлұмат бере алған. Осылайша аңғал адамдарды арбауына түсірген. Тәртіп сақшылары оның тағы бір алаяқтық фактісіне қатысы бар екенін анықтаған.
Қазіргі уақытта аталған фактіге байланысты ҚК-нің 190-бабы бойынша сотқа дейінгі тергеу амалдары жүргізіліп жатыр.