Тұрғындардың өміріне қауіп төнуі мүмкін екенін ескере отырып, осындай шешім қабылданды, деп хабарлайды @Pavlodarnews.kz тілшісі.
Облыстық төтенше жағдайлар департаментінің бастығы Жасұлан Жұмашев мамандар кентте және оған іргелес аумақтарда пайда болған ішкі жылжымалы көшкіндерді, жарықтарды тексеретінін мәлім етті.
«Ашық НҚА» порталында жарияланған жобада 1 наурыздан бастап Баянауыл ауданы Майқайың кенті аумағында жергілікті ауқымдағы техногенді сипаттағы төтенше жағдай режимін жариялау туралы жазылған.
– Баянауыл ауданының төтенше жағдайлардың алдын алу және жою жөніндегі аудандық комиссиясының 2024 жылғы 28 ақпандағы кезектен тыс отырысының №5 хаттамасына сәйкес, «Майқайың-алтын» акционерлік қоғамының жерасты кеніші аумағында жердің опырылуы орын алған жерге жақын орналасқан тұрғын үйлердің тұрғындарының өміріне қауіп төнуі мүмкін болуына байланысты Майқайың кентінде жергілікті ауқымдағы техногендік сипаттағы төтенше жағдай жариялансын, – делінген шешімде.
Баянауыл ауданының әкімдігінде құжат «Қазақстан Республикасындағы жергілікті мемлекеттік басқару және өзін-өзі басқару туралы», «Азаматтық қорғау туралы» ҚР Заңдары, ҚР ТЖ министрінің м.а. бұйрығы, сондай-ақ ауданның төтенше жағдайлардың алдын алу және жою жөніндегі аудандық комиссияның кезектен тыс отырысының хаттамасы негізінде қабылданды.
ТЖ жою басшысы болып аудан әкімінің орынбасары Еркін Арыстанбеков тағайындалды.