Ержүрек ұшқыш Хиуаз Доспанованың мектеп кезіндегі суреті табылды. Оны тапқан өлкетанушы Айболат Құрымбаев.
- Архивте көне басылымдардың тігіндісін қарап отырғанмын. Сол кездегі Батыс Қазақстан облыстық «Приуральская правда» газетінің 1940 жылы 4 қаңтардағы нөмірінің бірінші бетінде қаршадай қазақ қызының суреті басылған екен. Фотосуреттің сипаттамасында «Досанова Х.Х.» деп жазылғанымен, қазақтан шыққан қаһарман ұшқыш қызды бірден таныдым, - дейді жерлесіміз Айболат Құрымбаев.
Газетте суреттің астында «10-сыныптың оқу үздігі, №1 (Орал) орта мектеп бойынша комсомол комитетінің хатшысы Х.Х.Досанова Оралдағы Осоавиахим жанындағы аэроклубты мектептен қол үзбей оқып, «жақсы» деген бағамен аяқтады» деп жазылған екен.