Шымкенттік оқушы шетелдік 40 университеттен шақырту алды. Ағылшын тілінен білімін жетілдіретін орталықтардың бірінде оқыған отыз бала да осал емес. Әрқайсысына кемінде 20 оқу орны құшағын айқара ашып отыр. Барлығы 100 процент грантты қанжығаға байлап үлгерген.
17 жастағы Сунатулла Октамов шетелдің 110 университетіне құжат тапсырған. Оқу үздігі солардың ішінен 40 университетке шақырту алып отыр. Бизнес басқару мамандығын таңдап отырған түлек Малайзияда білім алуды құп көріп отырғанын айтады.
Сунатулла ОКТАМО, ОҚУШЫ:
Малайзияда бір жыл оқып, содан басқа елге ауысуды жоспарлаймын. Өйткені менің шақыртуларымда Европадан шақыртулар бар. Ол программа арқылы сол жаққа түсемін. Менің ойымда сол жақтың білімін алып, өзіміздің Қазақстанға әкеліп, Қазақстанда бизнесті дамыту ойымда.
Академияның тағы бір үздік түлегі -Нұрай Бейбітбай. Ол өзі құжат тапсырған 70 шетелдік оқу орнының 21 университеттен шақырту алған. Соның арасынан Италияның ең үздік университеттерінің бірі – Сиена университетін таңдап отыр.
Нұрай БЕЙБІТБАЙ, ОҚУШЫ:
Себебі дәл осы университет менің осы бизнес сферама өте көп мүмкіндік береді. Және де осы бизнес сфераны оқып, содан кейін өзімнің еліме қайта оралып, жұмыс істесем бе деген ойым бар. Себебі білесіздер ғой, әйгілі компаниялар бар, сол сияқты мен де өзімді осы елімді барлық бүкіл әлемге таныстырғым келеді.
Екі жыл бойы көз майын тауысып, білім деңгейін жетілдіріп жүрген Динара Нұрдәулет те- ата-анасы мен ұстаздарының үмітін ақтаған қыздардың бірі. 20 университет өзіне құшақ ашып отыр. Динараның таңдап отырған бәсекелестік ең жоғарғы мамандықтардың бірі - компьютер инженері.
Динара НҰРДӘУЛЕТ, ОҚУШЫ:
Мен әлем бойынша 20 –шы тұрған университет Торонто деген университеке түстім. Дегенмен менің қалауым Америка болған соң сол универді таңдадым. Менің ойымша Америкада менің мамандығым бойынша көптеген преспективалар бар.
Аталмыш академияда оқып жүрген 30 оқушы жалпы шетелдік оқу орындарынан 12 млн доллардың грантын ұтып алыпты.
Айгерім АСҚАРБЕКҚЫЗЫ, БІЛІМ ОРТАЛЫҒЫНЫҢ ДИРЕКТОРЫ:
Біздің мақсат-бәсекеге қабілетті жастарды өсіру. Біздің жігіттеріміз, қыздарымыз шетелге барып, мықты тәжірибелерді жинап келіп, Қазақстанның экономикасын дамытуына, Қазақстанды өсіруге үлесін қосады деп сенеміз.
Түлектердің де мақсаты- осы. Өзге елдегі озық білімді алса да, елге келіп, еңбек етуді көздейді.