Құрамында ресейлік ғарышкер Александр Гребенкин бар «Crew-8» миссиясы аясында Жерге оралған АҚШ Ұлттық аэронавтика және ғарыш кеңістігін зерттеу басқармасының (NASA) астронавты науқастанып ауруханаға жатқызылды, деп хабарлайды ТАСС ақпарат агенттігі.
Америкалық ғарыш ведомствосы сайтының хабарлауынша, жұма күні Флорида жағалауында Атлант мұхиты суына қонғаннан кейін «NASA астронавты өзін нашар сезінген». Экипаждың барлық төрт мүшесі, соның ішінде ресейлік ғарышкер Пенсакола қаласының (Флорида) ауруханасына жеткізілді.
Медициналық тексеруден кейін экипаждың үш мүшесі, оның ішінде Гребенкин Пенсаколадан шығып, Хьюстондағы (Техас) Джонсон ғарыштық ұшу орталығына жеткізілді.
Хабарланғандай, ауруханаға жатқызылған NASA астронавты (есімі аталмаған) дәрігерлердің бақылауында, оның жағдайы тұрақты. Бұл шаралар «сақтық мақсатында» қабылданды, деп атап өтті ғарыш ведомствосынан. NASA ТАСС-тың ауруханаға жатқызылған адамның денсаулығы туралы хабарлау, сондай-ақ экипаждың басқа мүшелерін, соның ішінде ресейлік ғарышкерді медициналық тексеру нәтижелерін хабарлау туралы өтінішіне әзірге жауап берген жоқ.
Америкалық SpaceX компаниясының Crew Dragon ғарыш кемесі Crew-8 миссиясының экипажымен бірге 25 қазанда АҚШ-тың шығыс жағалауы уақытымен 03:29-да (Мәскеу уақытымен 10:29) Жерге оралды. Гребенкиннен басқа, орбиталық станцияда 2024 жылдың наурыз айынан бастап орналасқан Crew-8 миссиясының экипажында NASA астронавттары Мэттью Доминик, Майкл Барратт және Джанетт Эппс болды.
Crew Dragon Халықаралық ғарыш станциясынан (ХҒС) 23 қазанда АҚШ-тың шығыс жағалауы уақытымен сағат 17:05-те (Мәскеу уақытымен 24 қазан 00:05-де) ажырады. Ол 8 қазанда өтуі керек еді, алайда ауа райының қолайсыздығына байланысты бірнеше рет кейінге шегерілді,- деп хабарлайды Kazinform.