Павлодар облысының тұрғыны оқушы қызды зорлады деген күдікпен ұсталды. Сотқа дейінгі тергеу басталды, - деп хабарлайды Tengrinews.kz.
Павлодар облысының балалар құқықтарын қорғау жөніндегі облыстық уәкілі Сәуле Шәкеневаның хабарлауынша, күдікті Баянауыл ауданындағы ауылдық мектептердің бірінде оқитын 15 жастағы оқушының өгей әкесі болып шықты.
"Бұл факт оқушының жағдайына назар аударып, оны қадағалап, үйіне барып, бақылау жүргізген сынып жетекшісінің арқасында ашылып отыр. Ол алгоритм бойынша әрекет етіп, жағдайға кінәліні табуға жәрдемдесті", - деді Шәкенева.
Полиция бұл ақпаратты растады.
"Зорлау фактісі бойынша қылмыстық іс қозғалып, күдікті уақытша ұстау изоляторына қамалды", - деді Павлодар облыстық полиция департаментінің баспасөз қызметі.
Сәуле Шәкеневаның айтуынша, бала қазір дәрігерлердің бақылауында.
"Кәмелетке толмаған баламен психологтар жұмыс істеп жатыр", - деп қосты ол.