Өрт сөндіруші болу -екінің қолынан келмейтін іс. Әр күнін өрт өтінде өткізу- нағыз батырлық. Тілсіз жауға қарсы тұру ерлікпен пара-пар. 24 сағат дабыл дыбысына құлақ түріп, оған қоса, жаттығуы мен сабағын қатар алып жүрген бүгінгі күннің батырларымен тілшіміз тілдесіп қайтты.
Дабыл дыбысы естілгеннен өрт сөндірушілер осылай апыл-ғұпыл киініп, дереу көлікке отырады. Жол-жөнекей қызыл жалын шарпыған аумақ туралы ақпарат пен алдағы іс-әрекеттері туралы тапсырма алады.
НҰРЫМ ОРМАНОВ, №23 ӨРТ СӨНДІРУ БӨЛІМІНІҢ ҚАРАУЫЛ БАСТЫҒЫ:
Өртке барғанда менің ең басты мақсатым – өртті көзбен бағалап, дұрыс шешім қабылдау. Жеке құрамға тапсырма беру. Өрттің таралуына жол бермеу, өртті жақсы ойдағыдай сөндіріп бөлімге оралу.
Өрт сөндірушілердің бір күні бір күніне ұқсамайды. Бірақ қызыл жалынды ауыздықтап келген соң, киімдері мен құрал-жабдықтарын тез арада ретке келтіру олардың күнделікті әдеті. Ел арасында «өрт сөндірушілер сусыз келеді» деген пікір қалыптасқан. Бекет қызметкерлері мұны жоққа шығарды.
НҰРГЕЛДІ ЕРМЕК, ӨРТ СӨНДІРУ КӨЛІГІНІҢ ЖҮРГІЗУШІСІ:
Бес тонналық машинаның суы насосты бар күшіне берген кезді, 5 тонна су 3-4 минутқа жетеді. Сондай жағдайда су бітіп қалады. Біткеннен кейін сусыз келді деген әңгіме содан пайда болады. Негізі ешқандай машина сусыз бармайды.
Қазір өрт сөндірушілерге барынша жағдай жасалған. Бекеттің ту сыртында жас отбасыларға арналған тұрғын үйде бар. Онда 12 жанұя қоныстанған.
ӘНУАРБЕК ЖАНАПИЯ, ӨРТ СӨНДІРУШІ-ҚҰТҚАРУШЫ:
Бәрі ыңғайлы. Техникалар жаңадан берілген. Жатақхана берілді. Жатақханада қазір 10 шақты семья тұрып жатыр. Он бөлме бар. Өзім де сол жатақханада тұрамын. Бізге де берілді. Іші бәрі жақсы. Барлығы жаңа үлгіде. Әрбір комнатада кондиционеріне дейін берілген. Тек киім-кешектерімізді алып, орналастық.
НҰРДӘУЛЕТ МЕЙІРБЕКОВ, ӨРТ СӨНДІРУШІ-ҚҰТҚАРУШЫ:
Үй ішім қуана-қуана қарайды. Мақтан тұтады, балам елге қызмет етіп, елге пайдасы тиіп жатыр деп. Бірақ әрқашан анашым уайымдайды. Күнделікті хабарласады. Өйткені ана болғаннан кейін жүрегі әрқашанда қобалжулы болады бізді уайымдап.
Байқағанымыздай, мұндағы мамандар аз сөйлеп, көп іс тындырады. Бұл еңбек адамдарын жақын туыстары ғана емес, барша халық мақтан тұтады.