Кәсіпқой
бокстан орташа салмақтағы әлем чемпионы қазақстандық Геннадий Головкин кезекті
мәрте чемпиондық белбеулерін қорғап қалды. АҚШ-тың Лос Анджелес қаласында өткен
жекпе-жекте отандасымыз чемпиондық атақтан үміткер америкалық Доминик Уэйдпен
қолғап түйістірді. Кездесу басынан АҚШ спортшысын ауыр соққылардың асына алған
қарағандылық саңлақ қарсыласын бірінші раундтың соңында нокдаунға түсірді.
Екінші раундта Головкиннің басымдығымен өтті. Өз кезегінде қазақстандық былғары
қолғап шеберінің қарқынына төтеп бере алмаған Доминик Уэйд негізінен қорғаныста
жүрді. Кезекті шабуылдың бірінде Головкиннің тағы бір жойқын соққысына тап
болған АҚШ спортшысы рингке сұлап түсті. Ауыр соққыдан кейін өз-өзіне келе
алмағанын байқаған судья жекпе-жекті тоқтатуға шешім қабылдады. Сонымен
Геннадий Головкин өзі өткізген 35 кездесудің барлығында үздік шығып, орташа
салмақтағы үздік спортшы екенін тағы мәрте дәлелдеп берді.
Велоспорттан
«Джиро дель Трентино» велокөпкүндігі мәресіне жетті. Дәрежелі жарыста сынға
түскен «Астана» велокомандасының спортшылары үздік қатарынан табылды. Үшінші
кезеңде қарсылас шақ келтірмей, межелі жерге бірінші жеткен Танел Кангерт
жарыстың соңғы күні топ жарды. Бұл бәсекеде елордалық клубтың спортшысы
венесуэлалық Маттео Бусато мен испаниялық Микель Ланданың алдын орап кетті. Бұл
жетістігінен кейін Танел Кангерт жалпы есептегі екінші орнын сақтап қалды. Ол
жеңімпаз атанған Микель Ландаға небәрі 2 секунд қана есе жіберді. Үшінші орын
«Астана» клубына бұйырды. Бұған дейін төртінші сатыда тұрған Якоб Фульсанг бұл
кезеңде сәтті өнер көрсетіп, жалпы есепте қола жүлдеге қол жеткізді. Еске
салайық. «Астана» клубы бірінші кезеңде өткен командалық жарыста жеңімпаз
атанған болатын.
Самат ҚАНАҒАТОВ