Спорт жаңалықтары. Шайбалы хоккейден «Братина»
кубогы жолындағы жарыс жалғасуда. Бұл сында ел намысын қорғап жатқан
Қарағандының «Сарыарқа» командасы әзірге сүрінбей келеді. Жартылай финалдың
алғашқы кездесуінде жерлестеріміз Нефтекамск қаласының «Торос» клубын 4:1
есебімен жеңді.
Ширек финалда Краснодар қаласының «Кубань»
клубын айналып өткен «Сарыарқа» командасы жартылай финалға жолдама алды. Бұл
сында қарағандылық ұжым екі дүркін «Братина» кубогының иесі «Торос» хоккейшілерімен
өзара мықтыны анықтайды. Нефтекамск қаласында өткен бірінші кездесуде Душан
Грегордың шәкірттері ірі есеппен жеңіске жетті.
Кездесу басынан алаң иелерінің
қақпасына лап берген қонақтар 2:0 есебімен алға шықты. Алдымен, Кирилл Лебедев есеп ашса, артынан Вадим Голубцов
есепті еселеді. Бұл шайбалардан кейін шабыттанған «Сарыарқа» командасы «Торос» клубының қақпасына тағы екі шайба соқты. Бастапқыда Виталий Ааб
мергендігімен танылса, келесі сәтте Владислав Лучкиннің қанжығасы майланды.
Өз кезегінде айдын иелері Антон
Зиминнің көмегімен бір шайбамен жауап қайтарғанымен, олардың одан артыққа шамалары
келмеді. Бүгін екі команда өзара қарымта
кездесу өткізеді.
Естеріңізге сала кетейік, финалға
жолдама алу үшін бір командаға қатарынан төрт ойында жеңіске жету керек.
Футболдан чемпиондар лигасында сынға түсіп жатқан «Пари Сен Жермен» командасы ширек
финалды сәтті бастады. Өз алаңында өткен кездесуде «Челси» клубын қабылдаған Лоран Бланның шәкірттері 3:1 есебімен басым түсті. Бұл ойындағы алғашқы голды алаң
иелері сапында Эсекиель Лавесси соқты. Қарымта шабуылға шыққан қонақтар
үзіліске дейін есепті теңестірді. Қақпа маңында тәртіп бұзылғанын байқаған бас
қазы пенальти тағайындады. 11-метрлікті сәтті орындаған Эден Азар мүлт кетпеді.
Үзілістен кейін үлкен күшпен
шабуылдаған «ПСЖ» командасы есепті еселеді. Бұл
сәтте допты қайтармақ болған қорғаушы Давид Луиз допты өз қақпасына соғып алды.
Екі голмен шектеліп қалмаған Лоран Бланның шәкірттері кездесудің қосалқы
минутында есепті ұлғайтты. Жеке дара «Челси» қорғанысын бұзып өткен Хавьер Пасторе командаластарының
қошеметіне бөленді. Екі команда арасындағы қарымта ойын 8-ші сәуір
күні Лондон қаласында өтеді.
Самат ҚАНАҒАТОВ