Италия астанасы Рим қаласында теннистен халықаралық турнир басталды.
Қазақстан теннисшісі Михаил Кукушкин алғашқы айналымнан сүрінбей өтті. Бұл
сында отандасымыз Португалия спортшысы Жоао Соузаны екі сетте айналып өтті.
Келесі кезеңде Кукушкин енді Испания спортшысы Давид Ферермен кортқа шығады.
Әлемнің үздік теннисшілері
Италияға жиналды. Бір апта бойы спортшылар кортқа шығып өзара мықтыны анықтайды. Бірінші айналымда
Болгария спортшысы Григор Димитров Франция теннисшісі Эдуард Роже Васселинмен
ракетка түйістірді. Бірінші сетте сауатты ойнымен көзге түскен Васселин 6:4 есебімен алға шықты.
Үзілістен кейін тез жиналған
Болгария теннисшісі табандылықтың арқасында таразы басын теңестірді. Бұл сеттен
кейін шабыттанған Григор Димитров ұпай санын түгендеді. Өз кезегінде жиі
қателесіп, қарсыласының қарқынына төтеп бере алмаған Эдуард Роже Васселин аяғы
жеңілісін мойындады. Сондай-ақ, өз кездесулерінде үздік шыққан Михаил Южный,
Стефан Робер және Томми Робредо келесі айналымға жолдама алды.
АҚШ мемлекетінде велоспорттан «Калифорния» туры жалғасуда. Екінші кезеңнен
кейін көшбасшы өзгерді. Бұл сында қысқа қашықтықтың хас шебері ұлыбританиялық
Брэдли Уиггинс жарыс лидерінің сары жейдесін иеленді. 20 шақырымға өткен
жарыста «Скай» клубының өкілі маңына жан жуытпады. Жеңімпаздан 44 секундқа
қалып қойған «Гармин» командасының спортшысы Рохан Деннис екінші орынды
иеленсе, үшінші сатыны «БМС» клубының өкілі Тэйлор Финни еншіледі. Ал бұған дейін
жалпы есепте көш басында болған ұлыбританиялық Марк Кэвендиш жеңімпаздан 1 минуттан
артық ұтылып, алғашқы он мықтының сыртында қалды. Дәрежелі жарыс жеңімпазы
18 мамыр күні белгілі болады.
Самат ҚАНАҒАТОВ