Өскемендегі қазақ және орыс
театрларының дауына өңір басшысы араласты. Журналистермен
кездесу барысында ол, қос театр да қоныс тойын тойлауға даяр болсын, деп кесті.
Жаңа ғимарат кең, әрі жайлы. Әртістер үшін де, көрермен үшін де ыңғайланып жасалған. Ал
жанжалды қазақ және орыс театрларының басшылары өршітті. Діттегендері - «директор орынтағы», - деді Бердібек
Сапарбаев.
Еске салсақ, Өскемендегі қазақ және
орыс драма театрлары бір шаңырақ астында жұмыс істеп келген. Өңірде заманауи
жаңа ғимарат бой көтергелі екі театр ұжымының арасында түсініспеушілік пайда
болды.
Бердібек Сапарбаев, Шығыс Қазақстан облысының әкімі:
Бүгінгі күнге дейін қалай болды, солай қала береді. Екі ұжымның да жаңа, заманауи ғимаратта жұмыс істегісі
келетініне шүбәм жоқ. Әуел баста театр қазақ емес, орыс емес облыстық драма
театры болады, деп жоспарланған. Біреулерге ұнамаса, ұнамай-ақ қойсын.
Ал, ескі драма театрының ғимараты бұзылмайды,
деп сендірді өңір басшысы. Күрделі жөндеу
жұмыстары жасалысымен, оған кім иелік ететіні белгілі болады, деп қосты әкім.
Алдын ала болжам бойынша мұнда облыстық бейбітшілік үйінің ұлттық мәдени
орталықтары да қоныстануы мүмкін.
Ләйлә ҚАЗИЯҚПАРОВА