Теннистен әйелдер арасынан Австралия ашық чемпионатының жартылай финалына
шыққан спортшылар белгілі болды. Ширек финалда үздік шыққан АҚШ спортшылары
Серена Уильмс пен Мэдисон Киз және Ресей теннисшілері Мария Шарапова мен
Екатерина Макарова енді өзара ақтық сын жолдамасын сарапқа салады.
Австралия ашық чемпионатының бас жүлдесінен дәмелі АҚШ спортшысы Серена
Уильямс әзірге сүрінбей келеді. Ширек финалда Словакия теннисшісі Доминика
Цибулковамен кортқа шыққан әлемнің бірінші ракеткасы жартылай финалға жолдама
алды. Кездесу басынан басымдығын нығайтқан Уильямс бірінші сетте 6-2 есебімен
басым түсті. Үзілістен кейінде алған бетінен қайтпаған Серена Уильямс ұпай
санын арттырды. Өз кезегінде жиі қателесіп, қарсыласының қарқынына төтеп бере
алмаған Доминика Цибулкова жеңілісін мойындады.
Келесі ойында Серенаның әпкесі Венус Уильямс отандасы Мэдисон Кизбен
ракетка түйістірді. Бірінші сетте сауатты ойынымен көзге түскен Киз 6-3
есебімен алға шықты. Үзілістен кейін тез жиналған Венус Уильямс ойын тізгінін
қолына алып, таразы басын теңестіріп кетті. Дегенмен, шешуші сетте өзінің
тәжірибелі қарсыласына қарағанда кортта ширақ қимылдаған Мэдисон Киз ұпай санын
түгендеп, 6-4 есебімен жеңіске жетті.
Футболдан Австралия құрамасы Азия кубогының ақтық сынына шықты. Жартылай
финалда Жасыл құрлықтың футболшылары БАӘ-нің командасын айналып өтті. Бұл
ойындағы алғашқы голды Анге Постекоглудың шәкірттері бұрыштама добынан кейін
соқты. Бұл сәтте баспен тура соққы жасаған Тент Саинсбери мүлт кетпеді.
Бұл голдан кейін шабыттанған алаң иелері келесі сәтте есепті еселеді. Қақпа
алдындағы қарбалас сәтті ұрымтал пайдаланған Джэйсон
Дэвидсон командаластарының қошеметіне бөленді.
Енді финалда Австралия және Оңтүстік Корея құрамалары Азия кубогын сарапқа
салады.
Самат ҚАНАҒАТОВ